Nongpoh, Nailur 08: Ki pulit jong ka Ri-Bhoi mynta ka step kila ioh ban kem ïa uwei u runar ba thmu lute bad pynpait ïaka iit jong kawei ka trok hajan ICAR Umiam.
Katkum ka jingtip bala ioh lum naki pulit la ïathuh ba hadien ka jingioh jingtip ba don ki briew kiba thmu ban pynpait ïaka iit jong kawei ka trok ha ICAR da ka jingthmu ban tuh bad lute, ki pulit kila hiar mar mar sha katei ka jaka, hynrei mar sien poi ki pulit, ki runar kila phet krad na katei ka jaka da kawei ka kali ka bym don number plate.
Hadien ki runar kila phet krad na katei ka jaka ki pulit kila kthong ïa katei ka kali kaba ki phet bad ioh ban kem ïa uwei u samla na Umsning bala tip kyrteng kum u Shemborlang Ryntathiang.
Haka jingtohkit bad talasi, ki pulit ka Ri-Bhoi kila ioh ban kurup 2 tylli ki mobile phone, uwei u tyrnem, kawei ka tari bala pyndonkam naka bynta ban lute ha surok, ba la ioh jingtip ruh ba kawei ka mobile phone ka dei kaba shu tuh ban sa aiti pat sha u trai.
Halor katei ka jingjia ki pulit kem noh ïa utei u samla bad ka jongtohkit naka bynta katei ka jingjia ka dang ïaid shakhmat naka bynta ban lap shuh shuh ïa kiwei pat kiba donkti.
