Nongstoiñ, Rymphang, 2: Ki pulit ka Nongstoiñ da ka jingïarap lang jong ki bor shnong ki la ïoh kem noh ïa u Biangkupar Nongsiej u ba na shnong Lawse, hadien ba u la pom da ka wait ïa ka Wansaralin Wanniang 26 snem karta na ka shnong Tiehsaw Nongstoiñ, kat haduh ba ka la khlad noh na ka pyrthei.
Katkum ka khubor pulit la ïathuh ba kane ka jingjia ka la jia hynne ka sngi ha Tiehsaw, ha kaba utei u Biangkupar u ba dei ruh u lok barim jong ka, u la pom ïa ka da wait na ki bynta jong ka khlieh kat haduh ba ka la mynsaw jur bad khlad noh kham hadien.
Na ka liang ki pulit ki la ïoh jingtip halor kane haduh ka por 7 baje janmiet bad hadien ba ki bor shnong bad ki ba haïing hasem ki la bat ïa u, la lah ban ïoh kem bad kurup ruh ïa u dieng ba u la tied ïa ka lok jong u.
Na ka liang ki pulit ki la register ia ka case bad leh ïa kaba donkam katba shong aiñ. Kumjuh ruh ka jingtohkit bniah halor kane ka jingjia ka la ïaid shakhmat.
Ki pulit ki la ai khublei kyrpang ruh ïa ka shnong bad ia ki bahaïing kiba la bat noh ïa u runar hadien kane ka jingjia.
