Nongpoh, Nailur, 07: Ki Pulit ka Ri-Bhoi hadien ka jingpynap shrip ha ka shnong Umpowin ha Ri-Bhoi District ki la ïoh ban kem ïa u Rangbah Shnong ka Umshangktad ha ka 5 tarik Nailur 2025 ha ka por kumba 9 baje eiei mynmiet hadien ka jingsuba ba u kit ïa ki jingdih buaid.
Ha katei ka jingpynap shrip ki Pulit ki la ïoh ban bat ïa kawei ka kali kaba don ïa u number ML 04 A 8969 ba la ñiah da u Bah Batskhem Sohtun u ba dei ruh u Rangbah Shnong ka Umshangktad kaba dei ka shnong khappud bad ka Assam ha ka thaiñ Block II ha Ri-Bhoi District.
Ha ka jingtalasi jong ki Pulit ki la ïoh ban kurup ïa u Ganja ba khia kumba 124.14-gram bad na ka liang ki Pulit ki la kem noh ïa utei u rangbah shnong bad register mukotduma bad la phah ruh ïa u sha iingkashari na ka bynta ka jingbishar bad ka jingtohkit halor katei ka jingïoh kurup kynja ka dang ïaid shakhmat.
