Nongpoh, Jylliew 18: Ki pulit jong ka Ri-Bhoi District hynnin ka miet kila ioh kem ïa uwei u snar khaii Ganja bad drok hadien ka jingioh jingtip ba thikna bad ioh jingtip ruh na u Director General of Police Meghalaya, halor ka jingdon jong uwei u briew u ba ju mlien ban die ïaki jait drok sha ki samla ka jylla Meghalaya bad Assam haki thaiñ Byrnihat.
Ki pulit ka Ri-Bhoi khlem da pynslem hadien ka jingtip ba thikna kila pynap shrip ïa utei u briew hynnin ka miet haka por kumba 6 baje eiei bad kem ïa uwei u samla bala tip kyrteng kum u Ricky Diengdoh na Byrnihat bad hadien ka jingtohkit, la suba ba utei u samla u la buhrieh ïaki jait drok ha iing jong u ha kaba ki pulit mar mar kila leit ban khynra ïaka iingsah kaba don ha Byrnihatgoan, Aamtola, Assam bad ha katei ka jingleit khynra ki pulit kila ioh ban kurup ïa kawei ka song byrni bala song bha ha jrong ka building, bad haka jingkhynra ki pulit kila lap pynban ba dei ka song Ganja (Marijuana) kaba don kumba 17.6 kilo ka jingkhia.
Halor katei ka bynta naka liang ki pulit kila kem noh ïa utei u samla bad la register case ha Nongpoh Police Station case No. 117(6) 22 u/s 20(B)/23(b) jong ka NDPS Act ban pynlong ruh ka jingtohkit ban lap shuh shuh ïa kiba donkti bad ban rat diengkhong ïaki kam dih bad khaii drok.
