Shillong, Ïaiong 15: Ki Pulit ka Jylla ha ka sngi balang, kila ïoh ban kem ïa u nongïalam ka kynhun “Lawei ba Phyrnai” kaba kam ïalade kum ka kynhun Kiengatiar bad kaba byrngem ban pynbthei bomb ha ki jaka pule ka Nongbah Shillong.
Ki Pulit kila ïohkem ïa une u Nongïalam ka Lawei ba Phyrnai na ka jaka ba u trei bad kila ïoh ruh bankurup ïa bun tylli ki kot ki sla kynthup ka mobile phone bala pyndonkam ha kaba phah ïa ka email ba byrngem pynbthei bomb.
“Ngi la ïoh kem ïa u nongïalam bad ïoh kurup ïa bun ki kot ki sla bad ka mobile phone ba phah email” ong u Assistant Inspector General of Police (A) Bah GK Iangrai ha ka kyrwoh ba phah hynnin ka sngi palei.
Haba shimkhia bha ïa kane ka jingbyrngem, ki Pulit kila register artylli ki case ha Crime Branch Police Station ba kynthup ïa ka jingphah email ba byrngem pynbthei bomb ha kylleng ki jaka pule.
Ka Tnad Pulit ka athaw ïa ka Special Investigation Team (SIT) ban tohkit ïa kine ki case haba pynkhlaiñ ruh ïa ka jingpahara ha kylleng ki jaka pule namar kane ka jingbyrngem jong ka “Lawei ba Phyrnai”.
Haba pyndonkam ïa ka jingstad ban pyndonkam ïa ki kor ki bor jong ka tnad Cyrber Crime Wing ka Meghalaya Police, ka SIT kala lah ban ithuh ïa uwei na ki dkhot ka kynhun haba tih bniah ïa ki email bala phah da ka Lawei ba Phyrnai.
Une u Heh Pulit u pyntip ba ha ka jingtihbniah ïa ki email bala phah, la pynthikna ba dei une u juh u briew uba donkti ha kaba phah ïa ki email jong ka Lawei ba Phyrnai
Une u briew ula phah nyngkong eh ïa ka email ha ka 1 tarik Ïaiong sha u Myntri Rangbah ka Jylla Conrad Kongkal Sangma, kaba kam bala thaw ïa ka “kynhun lehnoh” jong ki 37 ngut ki samla bala nang la stad bad ba khlem kam khlem jam.
Kane ka email kala kam ruh ba ka kynhun kala ïoh ïa ka jingiarap ha ka liang ka thied tiar ialeh bad ki kuli bad byrngem ruh ban pynbthei bomb ha kylleng ki jaka pule.
Ha ka 7 tarik Ïaiong, u Publicity Secretary ka Lawei ba Phyrnai ula phah biang sa kawei ka email ha kaba une u briew ula kam ïalade ba u dei u Nonghikai Skul ba shu trei Contract bad uba la shah pynkut noh na ka kam.
Ha kane ka email, kane ka kynhun kala pynpaw ïa kawei ka mat jingdawa bad kane ka jingdawa ka long ban pyllait noh ïa u Bah Julius Kitbok Dorphang Chairman barim ka HNLC, lem kumta ka kynhun kan pynbthei bomb ha kawei ka skul Lower Primary.
Kane ka Kynhun kala phah ruh ïa katto katne tylli ki email kiba byrngem byrsit ïa ka sorkar bad kam ruh ba u Organising Secretary jong ka kynhun u dei u “Software Engineer” haba kop ba ki Pulit kin nym lapdien satia ïa ki dkhot jong ka “Lawei ba Phyrnai”.
