Kem ki Pulit ia u heh spah na Beltola ha ka jingkhynra ïa ki karkhana Coke beaiñ ha Shallang

Nongstoiñ, Jylliew, 18: Ki Pulit ka West Khasi Hills District, ki la pynlong ïa ka jingkhynra kaba jur ïa ki karkhana coke ba be-aiñ hapoh ka District mynta ka taiew bad ki la ïoh kem ïa uwei u Heh spah na Beltola u ba pynïaid ïa kawei ka karkhana be-aiñ katba bun ki trai karkhana ki la phetrieh na ka kti jong ka Aiñ.
Kane ka jingkhynra ka la jia tang shi sngi hadien ba ka Ïing kashari Meghalaya High Court kaba bthah ïa u Director General of Police (DGP) ban wad ban kem ïa baroh ki trai jong ki karkhana coke ba beaiñ hapoh ka Jylla.
Ki Pulit Special Investigation Team (SIT) ka West Khasi Hills ha ryngkat ki Magistrate bad ka DMR, ki la hiar khynra ïa ki kar kana coke ha ka 17 tarik mynta u bnai ha ki thaiñ Shallang bad ki la ïoh ban kurup haduh 9000 MT u dewiong bad 800 MT u coke ba la pyllang ha kawei ka karkhana coke be-aiñ ba la tip kum ka M/s Kalyani Fuels Ltd.
Ki Pulit ki la kem ïa u trai jong kane ka karkhana u ba kyrteng u Youdishtra Bhama ba na Bongaon, Beltola, u ba dei u trai shnong ka Hisar District ka Haryana. La ong ba une u Heh spah u dei ruh u nongïasaid Aiñ.
Ki Pulit ki la ïoh ban tohkit lai sngi ïa u ne u briew halor ka case ba la register ha Shallang Police Station hapoh ka kyndon 188/34/379/120B IPC pule lang bad ka kyndon 3 (1) 21(1) MMDR Act, kyndon 15 EP Act bad kyndon 3 jong ka Explosive Substances Act.
Katkum ka khubor ba ïohlum, la ïathuh ba ki don haduh 57 tylli ki karkhana coke kiba don ha ki thaiñ Shallang bad la suba jur ba bun na kine ki karkhana ki dei kiba treikam be-aiñ.
Ki bor District ki pyntip ba ha kane ka jingkhynra, kila lap ruh ba bun na kine ki karkhana ki dei kiba be-aiñ bad ki trai ki dei ki Hehspah ba na shabar ka Jylla kiba la shu pynshah kyrteng ha ki briew lane trai shnong ka thaiñ Shallang. Ki pyntip ba kine ki trai karkhana ki la phet rieh mynta na ka kti jong ka aiñ.
Ki ïathuh ba bun na kine ki trai karkhana ki dei kiba na Haryana, Bihar, Uttar Pradesh, Jharkhand bad Assam nalor kiwei kiwei ki Jylla. Ki pyntip ba ka jingthwet ïa kine ki briew ka dang ïaid shakhmat.
Haba kylli, la ïathuh ba ka jingkem kan long ym tang ïa kine ki trai karkhana, hynrei wat ïa ki briew ne trai shnong kiba pynshah kyrteng ha ka ban pyntreikam ïa kine ki karkhana.
Ki ïathuh ba ki Pulit kin sa pyndonkam ruh ïa ki kyndon aiñ jong ka Benamy Transaction Act pyrshah ïa kine ki heh spah bad ïa ki trai shnong ba kyrshan ïa kine ki karkhana beaiñ.
La ong ruh ba kumba long haduh mynta ki don kumba 57 tylli ki karkhana saiñ dewiong beaiñ ha ka thaiñ Shallang baroh kawei.Ym tip ruh katno ki don ïa ki kot ki sla kiba biang bad katno pat kiba ym don kot don sla. Ka jingthwet bad jingkem ïa baroh ka dang ïaid shakhmat.