Khliehriat, K’lyngkot 09: Ki pulit jong ka Khliehriat Police Station, East Jaiñtia Hills District mynta ka sngi ki la kem noh ïa uwei u briew uba la tip kyrteng kum u Kheiñkor Muliar, 23 snem kyrta uba na shnong Mookympad East Jaiñtia Hills District ha kaba la suba jur ba u dei uba donkti ha kaba khaïi drok.
Ki khubor pulit ki ïathuh ba hadien ba ki la ïoh jingtip ba don ka jingsuba ba don kiba thmu ban khaïi drok, ki pulit mar mar hi ki la pynlong ïa ka jingpyn-ap ktem bad ki la ïoh bat ïa kawei ka kali alto rong lieh kaba don ïa u registration number ML-06-A- 0621 ba la ñiah da u Kheiñkor Muliar bad ha ka jingsakhi lang ki riew paidbah ki pulit ki la pynlong ïa ka jingkhynra na ka met jong u bad ki la lap ïa ki tiar ki tar ba kynthup kawei ka tyndong Ponds container ba la thep da ki powder ba rong soh bad hadien ba la test da ka NDPS test kit la pynshisha ba u dei u drok herion, la lap ruh kawei ka tin golden ba thylli, arphewsan tylli ki thyrnia injek (syringes) bad ki pulit ki la kurup noh ruh ïa kine ki tiar lem bad u drok uba khia 1.37 gram lem bad ka kali, shabi kali.
La ong ruh ba une uba suba khaïi drok u dei uba donkti ha kaba die bad khaïi drok ha ka thaiñ Sookilo bad ki jaka ba mar jan.
Ki pulit ki ka register ejahar pyrshah ïa u Kheiñkor Muliar ha Khliehriat Police Station ha kaba la pynngat hapoh ki kyndon aiñ jong ka NDPS Act bad ka jingtohkit ka dang ïaid haduh mynta.
