Shillong, Lber 23: Ki Pulit ka East Khasi Hills, kila ïoh ban kem ïa laingut ki runar kiba donkti ha ki kam tuh thuk thuk na kylleng ki jaka jong ka Nongbah Shillong bad ruh kiba donkti ha kaba lute ïa kawei ka petrol pump bala tip kum ka Mawkhanu Service Station, Indian Oil, kaba don ha ka Shnong Mawkhanu.
Kat kum ka jingpyntip u Superintendent of Police ka East Khasi Hills Bah S Nongtnger, ka Mawkhanu Service Station, kala shah lute ha ka miet 19 tarik Naiwieng 2021 ha kaba ki Nonglute kila siat ruh ïa arngut ki Nongtrei da ka pistol.
Ha kane ka jingjia, ki Nonglute kila ïoh khung bad rong tuh haduh T. 2 lak na kane ka petrol pump. Ïa ki Nongtrei ba mynsaw la pynkit sha NEIGRIHMS ba kin ïoh ïa ka jingsumar.
Ki Pulit kila register ïa kane ka case hapoh Diengpasoh Police Station hapoh ka kyndon 120B/452/326/307/427 IPC bad ruh hapoh ka kyndon 27 jong ka Arms Act.
U Bah Nongtnger u pyntip ba ha ka 7 tarik Lber 2022, ki Pulit kila ïoh ban kem ïa arngut na kine ki nonglute pump kiba la tip kyrteng u Barabor Namsaw ba ju khot sin u Kyrshan Makri bad u Bhaijan Warbah.
Ïa u Barabor la kem na ki thaiñ Police Bazaar bad la ïoh ruh ban kurup ïa ka thuk thuk ASOI-BH-5342 ba pyndon kam ha kaba leit lute ïa kane ka pump bad ïa u Bhaijan pat la kem na ki thaiñ Mawkasiang bad ïoh kurup ïa kawei ka Maruti Alto ba don u nombor ML10-C-5608.
Hynrei une u Heh Pulit u pyntip ba ha ka 8 tarik Lber, u Barabor Namsaw ula ïoh ban phet krad na ka kti ki Pulit bad ïa kane ka case la register hapoh ka Sadar Police Station hapoh ka kyndon 224 IPC.
U pyntip ba ha ka 23 traik Lber, ki Pulit k Sadar Police Station bad na Nongmensong Outpost, kila ïoh ban kem noh ïa u Barabor lem bad uwei u briew uba kyrteng u Khraw Shylla na ki thaiñ Nongmensong.
U pyntip ba kine ki dei ruh kiba donkti ha ki kam tuh thuk thuk na kylleng ki jaka jong ka Nongbah Shillong. Ka jingtohkit ïa kine ki lai ngut ka dang ïaid shakhmat mynta.
