Shillong, Nailur 01 : Ki Pulit ka South West Garo Hills, kila ïoh kem ïa 3 ngut ki dkhot jong ka kynhun ki nongtuh kiba dei na Assam, kiba donkti ha bun tylli ki kam tuh kam thiem ha kine ki khyndiat bnai bala leit hapoh ka District.
Kat kum ka kyrwoh na u SP ka District Vikash Varma, halor ki jingtip kiba paka, ka kynhun ki Pulit SWGH kila pynlong ïa ka jingkhynra ha ka thaiñ Mankachar da ka jingïarap ki Pulit ka Assam myn ha ka 29 tarik Nailar 2025.
Ha kane ka jingkhynra, ki Pulit kila ïoh kem ïa uwei u briew ba kyrteng u Iftakul Islam (43), uba dei na Thakuranbari, kaba don ha khappud Assam-Meghalaya.
Ki Pulit kila khynra ïa ka ïingsah une u runar bad ïoh kurup ïa bun bah ki tiar tuh kynthup ki battery, ki sainar tama, ka kor ot nar bad kiwei ki mar, kiba don jingiadei bad ki kam tuh kiba la register ha Ampati Police Station.
La kurup ruh ïa kawei ka kali pick up kaba ju pyndonkam da kane ka kynhun ki runar ban kit ïa ki mar kiba tuh.
Ha ka jingtohkit, la lap ba une u runar u dei jong ka kynhun ki nongtuh kiba ju leit pyntrei ha kylleng ki thaiñ ka ri-lum Garo bad ki bynta jong ka Mankachar, Assam. Kane ka kynhun ka ju tuh ïa ki tiar jong ka Sorkar bad ki nongkynti ki riew shimet.
Ki Pulit kila ïoh kem sa arngut kiwei pat ba kyrteng u Amirul Islam (23) bad u Shahidul Islam (26), kiba dei hi na Thakuranbari ha ka step sngi Nyngkong ka 1 tarik Nailur, 2025 bad ka jingtohkit mynta kala ïaid shakhmat ban nang lap dien ïa ki mar tuh bad ban ïoh kem ïa kiwei pat ki dkhot ka kynhun.
