Kem ki pulit ïa 2 ngut ki snar nonglute hadien ba ka thuk thuk ba ki tuh ka ngat ha ka aksiden

Shillong, Risaw 12: Ki pulit ka North Garo Hills ki la ïoh ban kem noh ïa arngut ki snar nonglute kiba donkti ha ki jingjia bapher bapher hadien ba ka thuk thuk ba ki tuh ka la kynduh bad ka jingjia aksiden ha Berubari, kaba hab ha Bajengdoba Police Station.
Katkum ka kyrwoh khubor ba la phah na ka ophis u Superintendent of Police ka North Garo Hills la ïathuh ba kane ka jingjia ka la jia haba kane ka thuk thuk ba ñiah da u Walchang K Sangma bad u Mikserbert Sangma ba shong hadien, ka la leit tynrah ïa uwei u dieng ha National Highway 51.
Na ka liang ki pulit hadien ba la ïoh ïa ka khubor jingjia aksiden, ka kynhun ki Pulit ka la hiar sha katei ka jaka bad ka la lap ïa kine ki arngut hapdeng ka jingmynsaw.
Ki Pulit ki la pynkit noh mar mar ïa kine ki briew sha Bajengdoba Primary Health Centre ban ai jingsumar. Ha ka jingkhmih ki doktor la shem ba kine baroh arngut kila buaid kiad, kaba lam sha kane ka jingjia aksiden.
Ha ka jingtalasi ïa ki pla jong kine ki briew, ki Pulit kila lap pynban ïa ki tiar pynmynsaw bad kiwei ki tiar ba rah da kine ki briew.
Ki Pulit mar mar ki la kurup ruh ïa kine ki tiar bad kumjuh ruh ïa ka thuk thuk Bajaj Platina kaba don u ML07-B-7072.
Ki mar ba la ïoh kurup ki kynthup ïa artylli ki suloi dieng, san tylli ki mobile phone, shi strip u Diclowin tablet, ki jaiñ, ka wait khukri bad kiwei kiwei.
Ha ka jingtohkit la lap ruh ba u Walchang u dei uba la shah kem teng halor ki kam bymman pyrshah ïa ki kynthei bad shah set ha Ampati PS bad ula shong haduh 7 snem ha phatok. U Mikselbert ruh u dei uba donkti ha ki kam rahbor ba la shah set ha Ampati PS.
Ki pulit ki la ïathuh ba kine arngut ki la ïasuhbuit hadien ba ki la ïakynduh ban leh ïa shibun ki kam pyntriem hadien ba ki lait na phatok bad ki la ïakynduh paralok ruh naduh ka por ba ki don ha District Jail ha Tura.
Ki la phla ba kila tuh ïa lai tylli ki mobile phone na kawei ka bos bad ka thuk thuk na Rongmil, East Garo Hills District.
La ïathuh ruh ba ka mukotduma halor ka kam tuh thuk thuk la dep ban tohkit da ki pulit ka Rongmil kiba la pynskhem ba la pynngat ïa ki hapoh Rongjeng PS Case No. 19/2025U/S 303 (2) BNS.
Na ka liang ki pulit ki la ong, “U Walshang u la phla ba ïa ki suloi dieng, kaba ki ïa rah, la shna da ma u hi ha ka ïing jong ka Kmie ieid kaba don ha RC Tura. U la shna ïa kine ki suloi ban pyntieng ïa ki briew haba leh ïa ka kam bymman.”
Halor kane, ki Pulit ki la register case pyrshah ïa kine ki arngut ha ki kyndon bapher bapher ka aiñ bad ka jingtohkit mynta ka la dang ïaid shaphrang.