Khliehriat, Nailar 24: Ki pulit jong ka East Jaiñtia Hills District, mynta ka sngi ki la ïoh kem ïa u snar uba na ka ri Bangladesh, uba la tip kyrteng kum u Misba Uddin, uba don kti ha kaba pynrung beaiñ ïa ki nong Bangladesh sha ri India, lyngba ki lynti khlaw kiba na khappud na shnong Kuliang, East Jaiñtia Hills District, la register case pyrshah ïa u ha Umkiang Police Patrolling Post.
Katkum ka jingpyllait khubor, u Superintendent of Police East Jaiñtia Hills District, u Jagpal Singh Dhanoa, IPS, la ong ba hadien ba ki pulit ki la ïoh ïa ki jingtip kiba tikna bha halor ka jingthmu ban wan rung tuh ki briew na ri Bangladesh, mar mar hi ki pulit jong ka Umkiang PP bad ki pulit jong ka Ratacherra Infiltration Check Post, ki la khang kdong ha ki jaka ha shnong Pyrtakuna bad ha Kuliang bad katba ki dang peitngor bha, ki la ïohi ïa kaei re kaei kaba khih ha ki jaka khlaw kaba hap hapoh u pud u sam jong ka ri India ha thaiñ Kuliang bad la sngewthuh ba u dei uba la tip bha ïa ki lynti khlaw kiba don ha kitei ki thaiñ, ki pulit ki la ïohi ïa uwei u briew ba u la wan ban mih sha surok national highway-6 ha Kuliang, u la pyrshang ban wad kali khnang ban dup ïoh ban kit ïa ki briew jong u kiba dang rieh sha khlaw, kumta haba ki pulit ki la ïohi ïa kine ki jingleh jong u, ki la tur bad ki beh bad kthong ruh ïa utei u snar uba la pyrshang ban phet rieh sha ki jaka khlaw bad ki pulit ki la ïoh bat ïa u bad la kurup noh na u kawei ka mobile phone bad ka wait tari bad la rah noh ïa u sha Umkiang PP.
Lyngba ka jingtohkit ki pulit, utei u snar ula iathuh ïa ka kyrteng bad ïathuh ruh bad u dei na ka ri Bangladesh, u la phla shuh shuh ruh ba u dei uba la don kti ha kiba bun tylli ki case ba pynrung beaiñ ïa ki nong Bangladesh sha kane ka District, ym tang katta, u la phla ruh ba dei ma u uba la ïalam lynti ïa ki ba bun ki nong Bangladesh kiba wan rung beaiñ kiba ïaid lyngba na ki lynti khlaw na ki khappud kiba ïajan bad ka East Jaiñtia Hills District “U dei uwei na ki snar uba ka tnat pulit ka la buh thong ban ioh kem bad ka jingtohkit ïa u ka dang ïaid”ong ki khubor na u Superintendent of Police, East Jaiñtia Hills District.
