Shillong, Risaw 13: Kumba bun ngut ki briew ki la shah kem hadien ba la lap na ki ïa shibun ki dawai psychotropic ha ki artylli ki jingleit kyndang jong ki pulit ka Anti-Narcotics Task Force (ANTF) ka West Garo Hills District ha kine ki sngi.
La ïathuh ba ha ka jingleit khynra kaba nyngkong, ki pulit ANTF ki la talasi hapoh ka checking point kaba don ha Tebronggre, Soil Compound area, halor ka nongrim jong ka jingïoh jingtip shaphang ki 2 ngut ki suba nongkhaïi ïa ki dawai psychotropic na Phulbari sha Tura.
Lyngba kane ka jingkhynra, arngut ki briew kiba la ithuh kyrteng da u Johnsbirth R. Marak bad u Chayang Ch. Marak, ki la shah bat bad shah talasi bad na ki la lap kumba 2,873 tylli ki capsule Senspa+ ba khia 1,106.105 gram bad 7 tylli ki capsule Senspa+ ba khia 2.095 gram, ïathuh u heh pulit ka district u Abraham T Sangma ha ka sngi Nyngkong.
Na ka liang ki pulit ki la ïathuh ba ha kawei pat ka jingleit khynra kaba la pynlong ha ka 11 tarik mynta u bnai, ki pulit ka ANTF ki la pynlong ka jingkhynra hapoh ka ïing jong u Rakizul Sheikh kaba ha ka shnong Patharkata, ha kaba ki la ïoh ban kurup haduh 122 tylli ki dawai kuli rongsaw (reddish tablets), 10 bilor ka Tuscorex cough syrup, bad 6,022 tylli ki capsule Syndex Plus.
Ki pulit ki la ïathuh ba Ïa kane ka jingjia la pynngat hapoh ki kyndon jong ka NDPS Act, bad ka jingtohkit shuh shuh halor kane ka jingjia ka la dang ïaid ban lap ksai halor kum kine ki jaitkam, ong u SP ka West Garo Hills District.
Halor kane ka jingjia, u SP ka West Garo Hills u la kyntu ïa ki paidbah ba kin ïai long kiba peitngor bad ba kin pyntip sha ki pulit lada ki ïohi ïa kum kine ki jingjia kiba ishankhmat kiba ïadei bad ki kam khaïi ïa u drok ne ki kam shah pyndonkam bakla sha ki police station kiba don marjan ne ha ki control room.
