Shillong, Rymphang 17: Ka Tnad Custom ka la ïoh kem ïa uwei u briew bad ïoh kurup ïa ka snieh bad ki shyieng jong u Khla Thapbasim.
Hadien ka jingïoh ïa ki jingtip kiba paka, halor ka jingkhaiï be-aiñ ïa ka snieh bad ki shyieng jong u Khla Thapbasim ha ki thaiñ jong ka Moran, kaba hap ha ka Dibrugarh District jong ka jylla Assam, ki ophisar jong ka Headquarter Preventive Unit, Shillong ki la leit mardor sha Dibrugarh District ha ka 14 tarik mynta u bnai.
Ka kynhun ka la pynlong ïa ka jingpeitngor kaba jur bha ha katei ka jaka bad ki la ïoh bat ïa uwei u briew uba la suba jur ula kit ar tylli ki pla ha ka thuk thuk.
Une u briew ula phet haba ïohi ïa kane ka kynhun bad ki ophisar ka custom kila beh thong ïa une u briew bad hadien kila ïoh ban kem ïa une u briew ula iehnoh shadien ïa kitei ki artylli ki pla bad ïa ka thuk thuk. Dei haba plied ïa kitei ki pla la lap ïa ka snieh bad ïa ki shyieng ki shruh jong u Khla Thapbasim.
La ong ba kane ka jingïoh kem ka la jia ha ka 15 tarik u Rymphang kaba dei ruh ka sngi kaba la rakhe ïa ka International Customs Day da ka Indian Customs kaba pyni ruh ïa ka jingshimkhia jong ka Customs ban ïakhun pyrshah ïa ki kam khaiñ ïa ki mrad.
U Khla Thapbasim ne Leopard (Panthera pardus) udei uba hap ha ka Schedule I jong ka Wildlife Protection Act, 1972, ïa kaba dei ban shim ïa ki sienjam kiba khraw tam ban ïada ïa kine ki mrad kiba kyrpang.
La ong ba ïa ka jingkurup la bud ryntih katkum ka Wildlife Protection Act, 1972 bad la kem noh ïa utei u briew ryngkat bad ïa kitei ki snieh bad ki shyieng kiba la ïoh kurup la aiti noh sha ka Forest Range Office kaba don ha katei ka thaiñ bad ka jaka.
