Jowai, Ïaïong 04: Ka Khasi Student Union (KSU) Jowai Circle bad KSU Moodymmai Unit mynta ka sngi ki la ïoh ban kem haduh 10 ngut ki khar Bangladesh.
Ïa kitei ki khar Bangla la kem hadien ba ka seng kala ïoh jingtip na ki riew paidbah bad la pynlong ka jinhap shrip ha man la ki thaiñ ka Jaintia Hills bad dei hapoh ka shnong Thadlaskeiñ ba ki dkhot ka KSU ki la bat ïa kawei ka trok kaba don u nombor RJ 07 GB 2246.
Na kane ka trok ki dkhot ka seng ki la lap ïa 10 ngut ki dkhar kiba shong rieh hadien kane ka trok, ka seng ka la tohkit ïa kitei ki briew Bangla bad la shem ba kim don satia ïa ki kot ki sla ban pynshisha ba ki dei ki nong India, hadien kane kita ki dkhar ki la phla ba ki dei kiba dang shu wan rung tuh na Bangladesh.
Ïa kitei ki khar Bangla ka seng kala aiti ha ki pulit na ka Infiltration Depart ment bad hadien ka jingtohkit la pynphai noh ïa kitei ki Bangladeshi shabar u pud u sam ka Meghalaya.
Ïa ka kynhun jong ka KSU la ïalam da u samla Phraki Howni Thubru uba dei u General Secretary ka KSU Jowai Circle, u samla Jerrymaia Laloo uba dei u Assistant Finance Secre-tary ka KSU Moodymmai Unit bad u samla Phrangki Papang.
Halor kane ka KSU Jowai Circle ka pynpaw ïa ka jingbitar pyrshah ïa ka sorkar jylla bad ka sorkar India halor ka jingbymlah ban pyntreikam ïa ka ILP tad haduh mynta kaba la ailad ïa ki mynder ri bad bar jylla ba kin rung laitlan ha ka Bri U Hynñiewtrep ka ba la buh jingma pat ïa ka Jaidbynriew Khasi ba rit paid kaba lah ban poi shaduh u pud jong ka jingduh jait.
Ka KSU ka kyntu ïs baroh ki paradoh parasnam ka thaiñ Jaiñtia Hills naduh ki shnong haduh ki Seiñ Samla ba kin long kiba pyrman bad pyntrei kam hi ïa la ka jong ka ILP ban teh lakam ïa ka jingwan rung kyrthep ki poiei shisngi. Pynkut ka kyrwoh khubor na u samla Juhhi Tariang Publicity Secretary KSU West Jaiñtia Hills District Unit.
