Shillong, Nailar 18: Katba nangmih ki sngi ka jingwan rung beaiñ nabar jylla sha kane ka jylla Meghalaya ka la nangbun nangbun ha kaba la ïohi lyngba ki sengbhalang bapher bapher ki la pynlong ki jingap pahara bad talasi manla ka sngi.
Ha kine ki jingtalasi ha kine ki sngi, ki la ïoh ban bat bad ban beh noh naba ki dei ki bar jylla ne ki mynder ri kiba wan sha kane ka jylla khlem ki kot ki sla kiba biang.
Ha kane ka kynti kaba mynta ka la jia biang ha ka janmiet jong ka sngi Nyngkong ha kaba ka Khasi Student’s Union Laban Circle ka la ïoh ban kem ïa uwei u bar jylla u bym tip satia u wan naei.
Ïa une u bar jylla la ïoh ban kem na Laststop, Laban bad ha ka jingtohkit ka seng une u bar jylla u la ïathuh ba u la wan na Kokrajhar, Assam lyngba ka Cycle.
Na ka liang ka seng KSU lyngba ka kyrwoh ka la ong ba la suba jur ba une u bar jylla u dei u nong Bangladeshi uba la wan lehse na ka jingjia shah kyndang kaba la dang ïaid haduh mynta da ka sorkar Assam ïa ki poi ei kiba na Bangladesh kiba la sah beaiñ ha kane ka jylla.
Haba ïadei bad kane na ka liang ka seng ka la aiti noh ïa une u bar jylla poi ei sha ki pulit ka Rilbong Beat House ban leh ïa kaba donkam katkum ka aiñ.
