New Delhi, Lber, 21: Shwa ba ka ri India baroh kawei kan leit sha ka Elekshon Lok Sabha sa tang khyndiat taiew, u Arvind Kejriwal uba long u Myntri Rangbah ka Delhi bad u nongïalam jong ka Aam Aadmi Party u la shah kem ha ka Enforcement Directorate halor ka jingkynnoh bamsap ha ka Liqour Policy.
Ka Enforcement Directorate ka la pynlong ïa ka jingtohkit halor ka jingbuhrieh ïa ka pisa bamsap kaba ïadei bad kane ka jingjia.
U Kejriwal un long u Myntri Rangbah ba nyngkong eh ban shah kem naduh ba ka ri India ka la ïoh ïa ka jinglaitluid bad ka Aam Aadmi Party ka la pyntip ba u Kejriwal un dang ïai bteng ban bat ïa ka shuki Myntri Rangbah.
Haba kren shabar ka iingsah jong u Myntri Rangbah ha ka sngi Palei, ka Myntri jong ka Sorkar Delhi ka Atishi ka la ong, “ngi la ïoh jingtip ba ka Enforcement Directorate ka la kem ïa u Kejriwal. Ka jingkem ïa u Kejriwal ka dei ka jingïasuhbuit da ka BJP bad u Myntri Rangbahduh ka ri u Narendra Modi.
Naduh ba la sdang ka jingtohkit halor kane ka Case naduh ar snem mynshwa, ka ED ne wat ka CBI kim shym la ïoh kurup satia wat tang shi tyngka ruh ha ka jingkhynra ba palat shi hajar sien ïa ki ing sah jong ki nongïalam ka AAP bad ki Myntri ka Sorkar Delhi.
Haba pyntip ba ïa u Kejriwal ym pat rai pynrem, ka Atishi ka la ong ba ka party kan sa leit ujor hakhmat ka Ingbishar Supreme Court pyrshah ïa ka jingshah kem jong u Kejriwal. “Ki muktiar jong ngi ki la leit sha Ingbishar bad ujor halor kane bad ngin dawa ba ïa kane ka case dei ban shong bishar mynta hi ka miet,“ ka la ong.
Ka kynhun jong ka ED ba kynthup ïa ki 12ngut ki Ophisar, ki la poi ha ingsah jong u Kejriwal da kaba rah lang ïa ka Search Warrant ha ka janmiet sngi Palei bad tohkit ïa u shwa ban kem. Ïa ka mobile phone jong u bad jong ka kurim la kurup bad ïa ki data la shim na ki ar tylli ki Tablet bad na ki ar tylli ki Laptop hapoh ka ingsah jong u.
Katba ki ophisar ka ED ki dang pynlong ka jingtohkit ïa u Kejriwal ha ingsah jong u, la pynap pahra ruh da ki Pulit ka Delhi bad ki pulit ka Rapid Action Force (RAF) bad kumjuh ruh ki Pulit CRPF. Nalor kata, la pynjari ruh da ki jingmana shabar ka ingsah jong u katba ki nongkyrshan ka AAP ki dang ïalum shabar ka ing ban pyrshah ïa ka jingkem ïa u Kejriwal.
Ka jingkem ïa u Kejriwal ka long tang hapoh shitaiew ba ka nongïalam jong ka BRS ka K. Kavitha ka la shah rah sha thanat ban shah tohkit halor ka Liquor Policy Case. Hadien ba la kem ïa ka, u Kejriwal ha ka sien banyngkong eh, u la shah jer kyrteng kum u nongïasuhbuit halor kane ka case.
