Shillong, Jylliew, 12: Ka Central Bureau of Investigation (CBI), Guwahati ka la kem ïa ki arngut ki briew ba kynthup ïa u Professor jong ka Zoology Department uba dei ruh u Dean of School of Life Sciences, ka skulbah North Eastern Hill University, (NEHU) Shillong bad ïa uwei u briew uba dei u trai jong kawei ka Kompeni na Guwahati, Assam ha ka por ba ki la phah ïa ka pisa kaba T. 3.43 lak ha Guwahati University Guest House, Guwahati.
Ïa ka case la rejister da ka CBI ha ka 11.06.2025 pyrshah ïa ki arngut kiba la shah kynnoh bamsap katkum ka jingïoh jingtip na ka tyllong jingtip ba u trai jong ka kompeni uba donkti lang bad u Professor jong ka Zoology uba dei ruh u Dean of School of Life Sciences, ka skulbah North Eastern Hill University, Shillong bad kiwei pat ki briew ki bym lah ban tip halor ka jingdonkti ha ka kam bamsap bad ha jingbuddien la lap ba u Professor u la shim kabu ban ai hukum na ka bynta ban pynbiang ïa ki tiar pule Science, ki tiar ba pyndonkam ha Laboratory bad kiwei kiwei bad ka jingpynkhuid noh ïa ka Bill.
Ka CBI kaba la pynap shrip ka la ïoh kem markhmat ïa u Professor. Ïa u Professor uba la shah kem la tian bishar ha Kashari ha Guwahati ha ka sngi Palei.
Ka CBI ka la pynlong ruh ïa ka jingkhynra ha ki ar tylli ki jaka bad lap ïa ki kot ki sla ba donkam. Ïa ka jingkhynra la pynlong ruh ha kiba bun tylli ki jaka.
Ka jingtohkit halor kane ka jingjia ka dang ïaid shakhmat.
