Tura, Jylliew 4: Ki Pulit ka Anti-Narcotics Force (ANTF) ki la ioh kem ïa 4 ngut ki nongkhaïi drok ha ka jingkhynra ha ka miet sngi Saitjaiñ bad mynta ka step Sngi U Blei ha West Garo Hills bad ïoh ban kurup ïa bun bah ki jingdih pynbuaid ba kynthup ïa u ganja, u heroin bad kiwei kiwei.
ïa kane ka jingkhynra la pynlong ha ka ïingsah jong uwei u nongkhaïi droks ba kyrteng u Aziar Mondol kaba don ha Rajpur, Phulbari, West Garo Hills.
Ha kane ka jingkhynra, ki Pulit ka ANTF ki la kem ïa 4 ngut ki briew kiba dei shi longïing ba kynthup ïa u Aziar Mondol, arngut ki Khun u Ziadur Mondol bad Riazul Mondol bad ka kurim ka Zobeda Bibi.
Ki Pulit ANTF ki la ïoh ban kurup haduh 2.5 kilo u ganja, 4.5 gram u heroin, 620 tylli u dawai kuli yaba, 39 tylli u Tramadol, 29 tylli ki Nitrazepam, 10 tylli ki synduk heroin ba thylli, 450 tylli ki bilor plastic barit, ka pisa T. 67,840, 9 tylli ki mobile phone, kawei ka TVS Apache Bike ML08-J-0156 bad 10 tylli ki lighter.
La suba jur ruh ba kine ki nongkhaïi drok ki dei kiba wan pynpoi ïa u droks na ki nongkhaïi kiba don ha ki Jylla ba marjan bad ki la ïoh lum bun ka spah na kaba khaïi ïa kine ki jingdih buaid.
Ki Pulit kila register case pyrshah ïa kine ki shi longïing hapoh ka Phulbari Police Station kat kum ki kyndon jong ka NDPS Act. Ka jingtohkit mynta kala ïaid shakhmat.
