Nongstoiñ, Nailar, 20: Ki Pulit ka Anti Narcotics Task Force (ANTF) jong ka West Khasi Hills ha ka janmiet sngi Saitjaiñ ki la ïoh kem ïa lai ngut ki briew ba la suba ba ki dei ki nongkhaïi drok na Iew Nongstoiñ bad na ka met jong kine ki lai ngut ki Pulit ki la ïoh kurup lai gram u drok heroiñ.
Ki Pulit kiba la ïoh jingtip kaba bniah ki la pynlong ïa ka jingkhynra ha Iew Nongstoiñ bad ïoh kem ïa kine ki briew kiba la tip kyrteng kum u Banraplang Sohlang, u Hubert Lamphrang Paliar bad uwei ba la buhrieh kyrteng.
Ha ka jingtalasi, ki Pulit ki la ïoh kurup ar gram ïa u drok na u Hubert bad shi gram na u Banraplang.
Nalor une u drok, ki Pulit ki la ïoh ruh ban kurup ïa kawei ka mobile phone bad ka pisa ba T. 5620. Ïa kine ki briew la register case hapoh Nongstoiñ Police Station bad la pynngat ïa ki hapoh ka NDPS Act. Ka jingtohkit mynta ka la ïaid shakhmat.
Kum ban shu pynkynmaw, dang ha kine ki khyndiat sngi, ka KSU-Nongstoiñ Pyllun ka la khang tala ïa kawei ka iing ha iew Nongstoiñ, halor ka jingsuba ba ka dei ka ktem jong ki nongkhaïi drok.
