Shillong, Kyllalyngkot 15 : Ka ding kala ïoh ban bam duh ïa ki katto katne ki bynta jong ka Shillong Engineering College ha ka step sngi Palei ha Mawlai Kynton Massar.
Kat kum ka khubor ba ioh lum, la suba jur ba kane ka ding kala mih na ka jingthut ka bording elektrik.
Ka bynta kaba pluh ka dei ka kamra kaba buh ia ki tusok ialehkai.
Mar ïa ïoh jingtip ïa kane ka jingjia, ki kali pynlip ding kila hiar mar mar sha katei ka jaka ban ïoh pynlip kloi ïa ka ding shuwa ba kan pur sha kiwei pat ki kamra
Halor kane ka jingjia u Myntri Rangbah ka Jylla Conrad K Sangma ula pyntip ba lah hukum ban pynlong ïa ka jingtohkit ba bniah halor kane ka jingpluh jong ka Shillong Engineering College
U Conrad ula ïathuh ba ka Sorkar kala lum jingkheiñ ïa ka jingheh ka jingjulor na kane ka ding bad pyntip ba kane ka ding kala ktah tang ïa kawei ka mala namar la lah ban pynlip kloi noh ïa ka ding da ki pulit pynlip ding.
“Ngam don satia ia ka jingtip ba pura bad nga, hynrei nga lah ban ïathuh ha phi ba ïa ka ding la lah ban pynlip mar mar bad ym shym la don kiwei pat ki mala kiba shah ktah” ula ong.
U Conrad ula pynpaw ïa ka jingkmen ba ym shym ka don kano kano ka jingjia ba sngewsih ha kane ka jingpluh. “Da ka jingïada U Blei, ym shym la don kano kano ka jingjia ba sngewsih…hynrei hooid, kala don katto katne ka jingjulor, hynrei ngam don ïa ka jingtip ba pura bad nga” ula bynrap.
