Shillong, Iaiong 12 : Ki Pulit ka Nongbah Shillong, ki la kem biang sa 16 ngut ki thei die met ha Shillong ba kynthup ruh ïa ki nongpynïaid ïew ïa ki ha ka jingkhynra ba pynlong ha Shillong ha ka miet 11 tarik Iaiong.
ïa kane ka jingkhynra la pynlong ha ka por 11:30 baje mynmiet ha ki thaiñ Police Bazaar, Presbyterian Church (Police Bazaar), IGP Point bad kiwei ki jaka ba marjan bad la ïalam ïa ka da u Additional SP Traffic Lovish Garg, IPS bad u SDPO ka Pynursla Bah B Wanswet MPS nalor kiwei ki Ophisar.
U Superintendent of Police ka District Bah Vivek Syiem, u pyntip ba ki Pulit ki la ïoh pdiang ïa ka jingujor ba man ka por na ki riew paidbah halor ki kam jakhlia, ka jingïa tyrwa leh kam awria bad ka jingpynthut ïa ki paidbah da ki thei die met.
U ïathuh ba ha ka jingkhynra la ïohi ïa ki thei die met kiba ïaid tyrwa ïalade sha ki nongïaid nongïeng, pyni dak ban leh kam awria bad pyrshang ban khring ïa ki shynrang, kaba pynisaidmet, pynthut ïa ki riew paidbah bad ktah ruh ïa ka jinglong kyntang jong ki jaka leh niam ba marjan bad ki jaka paidbah ba kongsan.
U pyntip ba ïa kine ki 16 ngut la kem da ka kynhun bad la rejister case ïa ki hapoh ka kyndon 110 jong ka Meghalaya Police Act.
