Kem bad shoh dusmon ki Pulit pahara khlaw ka Assam ïa u nonghikai skul

Nongpoh, Naitung 31: Uwei u samla ba dei ruh u nonghikai skul u la shah kem ha ki bor pahara jong ka tnad Forest ka jylla Assam hynnin ka 30 tarik Naitung ha kaba la kynnoh ba u la shah bom dusmon haduh ba un da mynsaw lut ha ki bynta jong ka kti bad ka met.
U tei u nonghikai skul u dei u ba la tip kyrteng kum u Noreshor Timung (28) na ka shnong Garo Banga (Amreng) kaba dei ka shnong khappud bad ka jylla Assam kaba hap ha Jirang Constituency, Ri-Bhoi District.
Katkum ka khubor ba la iohlum la ong ba ki bor pahara jong ka tnad Forest ka jylla Assam ki la kem ïa utei u nonghikai skul ha ka por kumba 2:00 ne 3:00 baje ei ei hynnin ka janmiet na ka shnong Umshalani. La ong ruh ba ïa une u samla la kem khlem da ïathuh satia na ka daw aiu hynrei la shu patan beit ïa u ban thep sha kali ryngkat ka bom ka shoh bad ïalam ïa u sha Lokhra.
Ki paidbah kila la sakhi ïa katei ka jingjia ryngkat ki bahaiing hasem, ki la leit shaduh Lokhra ban dawa pyllait ïa utei u samla. Ki la kynnoh ba wat ki paidbah kila shah ktah kti ha ki bor pulit bad shipai pahara jong ka tnad Forest jong ka jylla Assam.
Hadien katto katne ka por hadien kane ka jingjia, na ka liang u MLA ka Jirang u Bah Sosthenes Sohtun u la ïakren bad u DC bad SP ka Ri-Bhoi na ka bynta ban ïakren bad ki bor district jong ka jylla Assam bad hadien ka jingtuklar u MLA, ka tnad Forest Assam ka la pyllait noh ïa u hynnin ka miet hapdeng ka jingmynsaw.
Haba kren sha ki lad pathai khubor naka liang u MLA ka Jirang u Bah Sosthenes Sohtun u la ong ba kane jingpynbeit pud ha ka wat ba ar ka dang don ha lynti, hapdeng ka sorkar Assam bad Meghalaya bad ka jingshah rah jong ki briew naka jylla Meghalaya kam dei shuh kaba dang shu jia namar ha ki snem bala leit noh kila don ki rangbah kiba la shah rah ha ki Assam Forest.
U la ong ruh ba hadien ka jingshah kem utei u samla u la ioh ban ïakren bad u DC bad SP ka Ri-Bhoi ban shimkhia ïa katei ka kam namar ba ki paidbah ha katei ka thaiñ ki shong hapdeng ka suk ka saiñ, bad kim ju pynwit namar ki paidbah ki sngewthuh jingmut. U ong ruh ba u sngew lyngoh ba ki briew jong ka Assam Forest ki shu kem kulmar ïaki briew bad pharep kulmar bad ïa kane u ong ba kim lah satia ban pdiang.
U MLA u la kyrpad ruh ïa ka sorkar jylla ban kren bad ka sorkar Assam na ka bynta ka shongsuk shongsain ki paidbah ha khappud.