Kem 73 ngut kynthup 24 ki kynthei ïoh pyllait im 5 ki khynnah rit

Shillong, Naitung 23 : Ki pulit jongka nongbah Tura, West Garo Hills ki la leit khynra kyndit ïa ka “farm house” jong u Bernard N Marak kaba don shabar ka nongbah Tura bad ïoh ban kem ia 73 ngut ki briew kiba ïadon kti ha ki kam awria bad ïoh ruh ban pyllait im san ngut ki khynnah rit saw ki shynrang kawei ka kynthei ba la set ha kawei ka kamra kaba dum bad jakhliah bha.
ïa kane ka jingleit khynra ba kyndit kyndit la leh da ki pulit hadien ba la ïoh ka jingujor na kawei ka khynnah ba ka la shah leh beijot ha ki briew ha Rimpu Bagan ka ïing jong u Bernard N Marak uba dei u MDC ka BJP ha Garo Hills Autonomous District Council (GHADC).
Ha ka kyrwoh ba la pyllait da u Superintendent of Police (SP) West Garo Hills u Vivekanand Singh Rathore la ïathuh ba ki pulit ki la ïoh pdiang ka jingujor ejahar na kiba haïing jong kawei ka khynnah naduh ka 28 tarik Rymphang 2022 ba kane ka khynnah ka la jah na la ïing kumba shi taiew ei ei bad hadien ki la lap ïa ka bad uwei u briew bad mar mar la bat ïa u bad ïa ka bad aiti sha ka Women Police Station, Tura.
Hadien kane ha ka jingtohkit kane ka khynnah ka la phla ba la leh beijot ïa ka la kumba shitaiew ei ei bad kane ka la jia ha katei ka ïing u Bernard ka Rimpu Bagan bad la kynnoh ba u Bernard ruh u ïadon kti lang ha katei ka kam beain. Ki pulit ki la rejister case bad pynlong ka jingtohkit.
Ha ka jingphla jongka hakhmat ka ïing shari kat kum ka u/s 164 CrPC, kane ka khynnah ka la ïathuh ba ïa ka bad ïa kawei pat ka paralok jongka la ïalam da uwei u briew bad u paralok jongka sha Rimpu Bagan bad ki la wai kawei ka kamra bad ki la leh beijot ïa ka bun bun sien.
Kumta lyngba kine ki jingtohkit, ki pulit ki la pynlong ka jingkynra ba kyndit ha ka 22 tarik Naitung 2022 ha Rimpu Bagan bad ki la ïoh bat 68 ngut ki briew kynthup 24 ngut ki kynnah kynthei. Don ruh kiba la ïoh ban phet na ka jingdum jongka miet. Ki pulit ki la ïoh ban kem ïa u Manager bad lai ngut ki nongtrei jongka Rimpu Bagan.
Hadien kane la khynra ïa baroh kawei ka ïing bad sawdong ka phyllaw jong katei ka ïing ba la jer Rimpu Bagan da ka jingïadon lang ki nongsakhi kiba na shabar. La ïoh ban kurup 36 tylli ki kali, 47 tylli ki mobile phone bad 168268 Ml ka kyiad, shibun bah ki condom bad kiwei kiwei ki kot ki sla.
“Na ki kot ba la ïoh kurup bad kumjuh ruh la paw ba u Bernard uba la tip ruh da ka kyrteng sin kum u Rimpu lem bad ki paralok jongu ki pyndonkam ïa kane ka Rimpu Bagan kum ka brothel ne ka jaka ban ïa leh awria bad kam lehbeijot ïa ki khynthei” ong u SP Rathore.
Kumta halor kane la rejister case kat kum ka kyndon Immoral Trafficking (Prevention) Act 1956 bad ka jingtohkit ka la ïaid shakhmat. La kem baroh 73 ngut ki briew bad ïa kine la tian bishar hakhmat ka ïing bishar.
U SP ula ïathuh ba ïa u Bernard N Marak uba dei u trai jong kane ka jaka bad ba leh ruh ïa ki kam beaiñ la bthah ba un ïatrei lang bad ka kynhun tohkit bad kumjuh ruh ban leit pyndem hakhmat ka Shillong Sadar Police Station.
Hynrei u khlem treh ban ïatreilang bad u pyrshang ban phet rieh bad kumta ka jingthwet ïa u ka la sdang ban ïaid mynta, ïathuh u SP.
U SP u la ïathuh ïa kitei ki san ngut ki khynnah 4 ki shynrang bad 1 i kynthei la set ha ka kamra ba jakhlia bha. Ha ka por ba ïoh ban pyllait ki la long kum kito ki bym tip briew bad nang kren shuh. ïa kine baroh la aiti shaka District Child Protection Officer (DCPO) ban ri bad sumar ïaki kat kum ki kyndon aiñ.
U SP ula ïathuh shuh ba nalor ba la ïoh jingujor da ka jingthoh hynrei la bun bun sien ki riew don burom na nongbah Tura ki la ujor da ka ktien ba katei ka jaka Rimpu Bagan ka dei ka jaka ïaleh awria bad kam beaiñ. U la ong ba na ki jingthoh kiba don ha ki pulit u Bernard u don haduh 25 tylli ki case ba la rejister pyrshah ïa u na ki kam beaiñ jongu naduh u snem 2000. U la ong ba une u briew u dei u Chairman jong kata ka ANVC (B) bad hadien ba la pynwai ïa kane ka seng ruh u dang ïai bteng beit ban leh ïaki kam beaiñ kum ki kam dawa pisa na ki nong khaïi ha ïew Tura, jingbyrngem ïa kito ki bym siew ïa ka jingdawa ,u leh ïaki kam khaïi suloi beaiñ, pynïaid ïaki kam awria, die kyiad beaiñ, die ticket lottery beaiñ, die tim beaiñ, kyntur pud sha jaka kiwei nangta wat ïa ki trading licence ruh ju ai hi ma u.
Ha kane ka jingkhynra ki pulit ki la lap ba kane ka Rimpu Bagan ka don lai mala, ar mala shapoh bad shimala shalor bad ka don 30 tylli ei ei ki kamra ba rit. La suba ba ïa ki khynnah la leh beijot beit ha kane ka jaka, ong u SP.
Ki pulit ki la lap ba ki bun ki khynnah shynrang bad kynthei kiba ïa dih kyiad sngewbha hapoh ka phyllaw hapoh ka kali bad don kiba ïa shong lyngkhuit khlem jaiñ khlem sopti.
Ki pulit kila ïoh ban kurup 27 tylli ki kali rit, 8 tylli ki scooty, kawei ka auto rickshaw, 144 tylli ki kingfisher beer, 16 tylli ki ruborg beer, 25 ki wine ( ba lieh) 11 tylli ki black currant wine, 12 tylli ki wine rong saw, 12 tylli ki strawberry wine, 7 banana wine, 9 apple wine, 38 tylli ki royal stag whisky, 21 tylli ki signature, 5 tylli ki black berry breezer, 7 jamaican breezer, 47 tylli ki mobile phone, 1 ka crossbow barnett, kawei ka crossbow barnett bad u khnam, kawei ka wait tukri, kawei ka register ba thoh ïa ka kyrteng kiba wan sha katei ka farm house, kawei ka kopi kaba thoh ïa ki number ki kali ba wan rung sha phyllaw, 500 tylli ki condom bym pat pyndonkam bad 30,000 hajar tyngka ka pisa.