Shillong, Naiwieng 18 : Ka kynhun ïalehkai kriket jong ka Meghalaya ka la lah ba kan pynliem noh kdur ïa ka Sikkim da 2 wiket, ha ka lympung ïalehkai jong ka Cooch Behar Trophy 2025-26 ha ka Plate Group, kaba la long ha madan ïalehkai jong ka Meghalaya Cricket Association, Polo, mynta ka sngi Ba-ar.
Ka jingjop jong ka Meghalaya ka dei na ka jingïalehkai bha jong u Narleng uba la ïoh ban kamai haduh 128 ron bad ruh u Angkit Tamang uba la ïoh ban kamai 35 ron khlem pat liem.
Hadien ba ka jingïakhun ka la poi ha u pud ba ka kynhun kaba jop ne rem kan dei beit da ka bok lane ban kut ha ka jingïakhaid, ha kane ka kynti u rangtied ba 10 jong ka Meghalaya u Apandanka Marak, khlem bakla u la ïoh ban khyrwit jam ïa ka bol ba kan poi shabar jong ka madan kaba la pyntikna artad ïa ka kynhun ban jop suk.
Mar ïa poi ka bol shabar ka madan baroh ki rangïalehkai ki la mareh lut shapdeng madan ban ïa shad ïa kmen halor kane ka jingjop.
Haba phai khyndiat sha ka jingïakhun, ka kynhun ïalehka ijong ka Meghalaya ka donkam 260 ron ban jop ïa kane ka jingïakhun, bad ba ka la wan ban sdang ïa la ka pali ban kamai ron, ka la hap noh haduh lai wiket ha ka por ba ka dang ïoh kamai tang 53 ron. Hynrei da ka mynsiem ïakhun kaba tyngeh, ka la lah ba kan kot ïa kane ka thong hadien ba ka la hap noh 8 wiket.
Haka sngi kaba sdang ka Sikkim ha ka pali wan tied ba nyngkong, ka la lah ba kan kamai tang 76 ron bad hadien kane, ka Meghalaya pat ka la lah ba kan kamai 108 ron. Kumta ha ka pali wan tied kaba ar (second innings), ka kynhun ïalehkai ka Sikkim ka la ïalehkai kham bha bad ba kan kamai haduh 291 ron.
Ka dawbah jong kane ka jingjop ka Meghalaya ka la wan na ka jinglah kamai lang ha ka wiket kaba hynriew hapdeng u Gaurav bad u Angkit, kiba la lah ban kamai lang haduh 136 ron.
Ha kane ka jingïakhun ka Sikkim kam shim la treh ba kan pyndonkam da ka bol ba thymmai, ïa kaba ka la ïai bteng ban pyndonkam da ka bol barim, kum shi bynta ban ailad ïa la ki spinner ba kin leh ïa kaei kaba ka kynhun ka donkam. Hynrei kane ka buit ba la pyndonkam ka Sikkim kam shym la lah ba kan tehlakam ïa ki rangtied ka Meghalaya ban kamai ïa ka ron kaba ki donkam ba kin jop ha kane ka jingïakhun
Haba ïadei bad kane ka jingjop, u President ka MCA u Naba Bhatacharjee, u niew bad shim ba ka long ka jingjop kaba pynkyndit, kaba kren shai ïa ka mynsiem jong ka jingïakhun da baroh ki nongïalehkai, kaba khlem pep kan ai mynsiem ïa ka jingïalehkai ha kane ka jylla.
Da kane ka jingjop, ka Meghalaya kan mih na la iing ban hiar pat sha Anand, Gujarat kum shi bynta ka jing pynkhreh naka bynta ban ïakhun pyrshah ia ka Manipur, kaba la buh ban sdang naduh ka 23 tarik mynta u bnai.
“Ka jinglah jong ka kynhun U-19 jong ka jylla ban jop ka la pyni ïa ka mynsiem ïakhun kum ka kynhun. Kane ka samoi kam dei tang jong ki U-19 hynrei ha baroh ki thup ïalehkai ki la pyni ïa ka jinglah jong ki ban ïalehkai bha,” ong u President ka Meghalaya Cricket Association, Nababrata Bhattacharjee
