Shillong, Nohprah, 12: Ha ka jingjia kaba pynkyndit ïa baroh, ka kali sorkar jong ka Myntri ka tnat ka Koit ka Khiah jong ka Sorkar Jylla ka Dr. Ampareen Lyngdoh ka la shah kawang maw ha ki runar ha ka miet sngi Baar katba ka dang leit phai bad la ki jong ki bahaing hasem. Kane ka jingshah kawang maw ka la jia hajan Greenhill Restaurant ka surok ban leit sha 4th Furlong, Polo, Shillong.
Ha ka jingshah kawang maw, ka iit ba nakhmat jong ka jingkhang na ka liang ka diang jong ka kali jong ka Myntri kaba don ïa u nombar ML-01 0011ka la pait lut bad la suba ba la kawang da ki kynja nar ba khia. Donbok ba ki briew kiba shong hapoh ka kali kim shym la mynsaw satia ha kane ka jingjia, namarba ym don satia kiba shong hakhmat jong ka kali ha kane ka por.
Ka Dr. Ampareen ka la ujor da ka ejahar ha ki Pulit jong ka Laitumkhrah Police Station ha ka sngi Palei halor kane ka jingjia kaba la pynher syrngiew lut ïa ki bahaing hasem.
Ka thymmei khubor kaba ïajan na ki bahaing hasem ka ïathuh ba kane ka jingjia kaba la pynsyier bad pynrit mynsiem sah ïa ki haduh mynta, ka la pynlong ïa ka ing ka sem ban pynslem ïa ka jingujor sha ki Pulit.
Ïa mynta ki bahaing hasem kim pat tip tikna la ka jingshah thombor ka dei kaba la thmu khnang ne la dei kaba shu jia ryngkhat.
