Katto katne ki jingtip shaphang ka jingshah lehbeiñ ki Khasi – Pnar ha Block – 1 hapdeng ka snem 2000 – 2017

Ïa ka Block-1 latip mynshwa kum ka Elaka Labang Nangphyllut & Pangam Raliang. Ïakane ka elaka la pynlong daki lai tylli ki Raid; ka Raid Nongjrong Raid Labang bad ka Raid Nangphyllut katba ka Pangam Raliang pat ka hap hapoh ka Elaka Raliang.
Ki briew kiba shong ba sah haka ne ka thaiñ la tip kum ki Nongjrong Labang bad Nangphyllut kiba long ki Sub-tribe jong ka jaid bynriew Khasi Jaiñtia.
Kine harum kilong katto katne naki jingshah lehbeiñ ki Khasi Pnar kiba shong basah ha kane ka thaiñ naduh baki hap sha United Cachar & Mikirs Hills Karbi Anglong Assam;
1. Ka jingshah pynduh pyndam ïaka kam Dolloi.
Ka Elaka Labang Nangphyllut kadei kawei naki Elaka barim tam hapoh ka Hima Jaiñtia kumba la tip ïaka Ri Khasi Jaiñtia kum ka ri ki laiphew syiem bad Khad-ar Dolloi. U Dolloi Labang Nangphyllut u dei ruh u Dolloi ñiam uba dei ban pyndep ïaka ñiam ka rukom ka kñia ka khriam ka phur ka siang ka kam ïap kam im bad kumjuh ïaka riti ka dustur.
Wat lada ym lah ban tip ïaka samoi treikam jong ki ruh, kine harum ki long ki dolloi kiba ngi lah ban tip kyrteng; 1. Sar Trang 2. Blung Tamaha 3. Yaani Tamaha 4. Yaani Lyngdoh (acting) 5. Brit Samaiang bad 6. Honriwell Pyrpet.
Kat kum ka jingtip kaba la ïoh lum te u dolloi Honriwell Pyrpet u dei u dolloi uba khatduh uba ïoh jing ithuh naka Jaiñtia Hills Autonomous District Councils, u synshar kat haduh ka snem 1978 tad haduh bala pynduh pyndam noh daki Karbi.
Ka jingshah pynduh pyndam ïaka kam dolloi ka ktah shi katdei eh ïaka ñiam ka rukom kham tam eh ïaki ba dang bat ïaka ñiam tre niam tynrai ïaka riti ka dustur jong ki, namar ba ymdon shuh kiba dei bad kiba lah ban pyndep. Ka pynduh pyndam noh ïaka ñiam ka rukom ka jingngeit tynrai bad ka riti ka dustur jong ki.
2. Ka jingphah jubor ban register ïaka khyndew ka shyiap shapoh Karbi Anglong Assam.
Hapoh ka jingsynshar jong ka sorkar phareng (1835 – 1947) kane ka thaiñ ka hap hapoh ka Jowai Civil Sub-Division. Bad wat hadien bala thaw ïaki District Councils ka United Khasi & Jaiñtia Hills District ruh ki briew nangne ki dang don ki kot ki sla ki Patta ne ki dukir khyndew shapoh United Khasi & Jaiñtia Hills District Councils, katto katne la ïoh lum bad ki ladon ha nga.
Hynrei kham hadien ki Karbi kila maham, daka ba kem ïa u dolloi Honriwell Pyrpet bad pynsmai ruh ïa u ba um dei shuh ban khrong khajna bad ban bat ïaka kam dolloi te ma u ruh um nud shuh ban long dolloi bad ka kam dolloi kala kut noh artad hapoh kane ka Elaka.
Te ki Karbi ki pyntieng pynsmiej bad ki pynbor noh ïaki paid Khasi Pnar ban register noh ïaka khyndew ka shyiap jong ki shapoh Karbi Anglong Autonomous Council, Assam. Daka jingtieng jingbieij bad jingleh klet jong ki District Councils jong ngi te kiba pli kine ki briew kim banse ban register noh ïaka khyndew ka shyiap jong ki shapoh Karbi Anglong.
Nga pynshisha ba ïakane ka kam Land Registration baki leh shapoh Karbi Anglong Assam kadei ym daka mon jong ki, hynrei dakaba shah pynbor bad shah maham
3. Ka jingpynbor bad jingmaham ban leh enrollment Election Photo Identify Card sha Assam.
Kumba kila shah pynbeij bad shah pynbor ban register ïaka khyndew ka shyiap jong ki naduh ki snem kiba mynshwa te kane lei ka enrollment iaki Election Photo Identify Card te kila suk bha ban pynkohnguh ïaki namarba kane ka hukum kadang mih dang haka snem 2000 shaneng.
Jia ryngkhat ruh ba hapdeng kine ki snem mih saki kynhun kaikhlaw ba pher bapher jong ki kum ka Karbi National Volunteer (KNV) Karbi Peoples Laberation Tiger (KPLT) Karbi Longri Raikom Asong (KLRA) bad ka United Peoples Democratic Solidarity (UPDS) te ki suk bad ïohbor bha ban pyntieng pynsmiej ïaki ban leh ïakane ka kam. Kumta kiba bun naki briew jong ngi ki don ki Election Photo Identify Card jong ki sha Assam. Hynrei ïakane ruh, ym baki leh daka mon jong ki hynrei daka jingpyntieng pynsmiej jong ki Karbi.
4. Ka pynduh ïaki kam pynroi bad ki kran ki skim.
Kumba ngi tip ba hapoh Block-1 kidon haduh 36 tylli ki shnong Khasi Pnar bad ha baroh kine ki shnong ym don surok ymdon lynti syngkieng , ymdon bording eletrik , ymdon dukan ymdon ïew don hast, ymdon umbam umdih ym don skul ymdon dispensary PHC CHC lymne Hospital wat tang kawei ruh. Kim ïoh ruh ïaki khaw rashon, bad kiwei kiwei de ki kran ki skim lane ki lad jingïarap ba bun jait naka sorkar.
Dang hakine ki shisnem arsnem ba ki pyrshang ban ai khyndiat khynsoit hynrei ki briew jong ngi ki la rai ban ym pdiang kat bym pat tikna u pud u sam.
Ki briew kiba shong basah sha kane ka thaiñ ki im kumba myn dang haka spah snem kaba mynshwa. Ki mad ïaka jingkordit jingsohsat bymlah shuh ban batai. Khamtam eh haka duk ka kyrduh ka pang ka shitom, Kim ïoh ruh ïaka puke puthi kumba kidei hok ban ïoh.
5. Ka jingshah knieh ki pud shnong pud thaw.
Baroh ki pud shnong pud thaw kiba dei pud bad ki shnong Karbi te la shah knieh beit u pud u sam shnong jong ki.
Ka shnong Madan Myn-I bad Mynriah ki shah knieh haka shnongUmpu Umbaso bad Rongpangbong, ka shnong Nongjrong haka shnong Tahpat bad Rongpangbong , ka shnong Moorap Mooriap ki shah knieh haka shong Rongpangbong bad Chenan cherop , ka Khyndeliar bad Mookhim haka shnong Upilangso ka shnong Thangrong haka shnong Rongmukhim ka Madan Namgkylla haka Jrikyndeng, ka Deinler Lamarang Moojem haka shnong Tibin Moothade bad Mookoilum bad kumta ter ter.
Wat ki shnong kiba don kiba don shapoh West Jaiñtia Hills District kum ka Mukroh Lapangap Khanduli Mookoiram ruh kidang shah knieh haki shnong Karbi lyngba jong ka Karbi Anglong Autonomous Council , Assam.
Ki briew kiba sah sha kine ki thaiñ ki im daka ba rep ba riang te ki shem jingeh bha namarba kila shah knieh lut ki jaka rep jaka riang jong ki.
6. Ka jingshah lehbeiñ haka niam ka rukom.
Nalor baki dion laka jong ka jingngeit lane ka niam ka rukom ka riti ka dustur ruh ki Karbi ki dang khrong pisa khrong khaw khrong syiar blang bad sniang jan man ko por baki pynlong ïaka kñia ka khriam jong ki. Bad ynda don pat ka lehniam leh rukom ka kñia ka khriam jong ki Khasi Pnar te tang ban pyrshang khrong ruh kim nud hi.
Ïaki balang Khristan pat, kum ki Khristan Presbyterian kiba don haka shnong Nongjrong bad Madan Myn-i kiba hap hapoh jong ka Karbi Anglong Presbyterian Synod ki don tang 25-30 ïing, hynrei ki thung balang jubor ïaki bad ki hap ban pdiang ïaki jingiaseng kiba heh baheh. Ki hap ban pdiang haduh kumba 50-60 ngut ki briew kaba long shaba palat eh u pud naka jingïoh bad jingkot bor jong ki haka ba ki hap ban kit ram naka bynta ka ne. Kaba sngewsih ka long ba tang ïaka ram jong ka jingïaseng kaba lah dep kim pat dep siew ki la dei pat ban shim ram biang naka bynta ka jingïaseng kaba thymmai.
7 . Ka jingshah lehbeiñ haki kynhun Kaikhlaw.
Kumba la thoh haneng, daka jingdon jong kine ki kynhun kaikhlaw jong ki te ki te ki nud bad ïohbor bha ban thombor ne lehbor ïaki briew jong ngi haki bun rukom.
Hapdeng ki snem 2000-17 kalong ka por kaba kordit bad kaba sangsot tam ïaki paid Khasi Pnar bashong basah ha Block-1 daka jingdon jong kine ki kynhun seng lehnoh kumba la kdew haneng.
Ki hap ban siew khajna bai ïing ïaka bala tip kum ka House Tax sha kine ki kynhun lehnoh man la u snem, man la kawei pa kawei ka longïing sha ka wei pa kawei naki ne ki kynhun naduh kumba 500 haduh 5000 tyngka kawei kawei ka longïing , nalor baki hap ban siew sha ka Karbi Anglong Autonomous Council.
Nalor ba ki hap ban siew ïakane ka khajna , ki dang wan rung shapoh shnong poh thaw bad rah jubor ia u khaw ki jhur naki iing briew haduh ba kim don shuh wat tang ban shet.
Ki siat bad rah ei aki syiar ki blang ki sniang bad ki jingri jingdup jong ki briew katba ki mon, bad lada pan pisa te ki pyntieng bad pnang daki ktang suloi. Kane kadei kaba pynduh nong shi katdei eh bad kaba pyniam kthang ïaki briew jong ngi namarba kiba pli ki shaniah tang haka rep ka riang bad ki jingri jingdup naka bynta ka jingim jong ki.
Ym tang kane, kito kiba kham don kham em te ki dang dawa pisa , bad don ruh ki por baki wan lute ïaki ïing ki sem jong ki bad rah lut kat kaba don ba em bad haba kim ïoh ei ei te ki pom ki daiñ ïaki ïing ki sem.
Nalor kane, ki dang thap dang kynjat dang kura ïaki briew khlem kino kino ki daw. Ki leh kynshleiñ bad jrong kti wat ïaki kynthai khynnah ruh. Haka snem 2005 kine ki kynhun seng lehnoh ki thombor bad bad leh beijot na phang ïa baroh ki longkmie ki kynthei khynnah wat ïaki ba armet ruh kim map shuh haka shnong Mooriap bad ïaka wei ka longkmie haka shnong Laher.
Ym lah ban ïoh jingtip ïaki tarik bad ki bnai ki snem , hynrei kine harum ki long ki Khasi Pnar kiba shah pynïap ei haki Karbi hapdeng ka snem 2000-16, 17. 1. U Jokim Lekhaden bad 2. U Olin Lekhaden naka shnong Madan Myn-i. 3. U Hemmari Beh haka shnong Mooriap (une u dei u Karbi hynrei tang namar ba u shongkha haka Pnar) 4. U Jim Larom bad 5. U Endrias Lyngdoh naka shnong Mookhim. 6. U E. Bhoi naka shnong Mooknor 7. U Ronit Larom naka shnong Khyndeliar 8. U Phosting Dkhar naka shnong Mowlaiñ bad 8. U Wilson Lyngdoh naka shnong Mowluber. Kine ki long tang kiba nga lah ban ïoh kyrteng, lehse ki dang don kiba ngam pat ïoh kyrteng ruh. (Lada ka sorkar ka kwah ban ïoh ïaki jingtip bad jingshisha halor kane te nga kloi ban leit ïalam sha ki ba ha ïing ha sem jong kine ki lanot).
Namar kane ka jinglehbeiñ bad ka jingthombor jong kine ki kynhun kaikhlaw Karbi te ki paid Khasi Pnar jong ngi kim lah shah shuh bad kumta Kim ban se ban ïeh ïaki ïing ki sem jong ki bad phet shong sha Sahsniang haka snem 2003. (Kane ka dei ka refugee kaba ar kaba nyngkong kadei haka snem 1971-72 haka ba ki phet sha Barato bad Mukroh). Nangta haka snem 2015 ki paitbhur Karbi bad ki seng lehnoh kila wan thombor biang ïaki Khasi Pnar bad ki pynïap dusmon ia u wei u briew uba kyrteng u Labarious Nongrum haka shnong Madan Myn-i. Kane ka daw kamih tang namarba ki suba seng lehnoh ïaka wei ka seng bhalang kaba kyrteng ka Jaiñtia National Union (JNU) kaba wan seng unit be circle sha tei.
Ki rung shapoh kishnong ki thaw jong ki Khasi Pnar daki spah ngut bad ki thombor ïaki briew daka ba pyn-ap daki wait ha ryndang bad ki pom ki daiñ naphang ïaki ïing ki sem ki thiar kba bad kiwei kiwei de. Hakaba ki briew jong ngi kim banse ban ïeh biang ïaki ïing ki sem jong ki bad phet shong biang sha Mowluber Saitsama Namdong Khanduli Lapangap bad wat shaduh sha Jowai ha Office jong ka seng Jaiñtia National Union ha Mooralong.
Kaba pynlung mynsiem bad pyn pangnud shuh shuh ïaki briew jong ngi kalong ba ynda haba ki leit phai naka ne ka jingphet wir sha ki shnong ki thaw jong ki. Ynda kiba pli kila poi shala ki shnong ki thaw jong ki ym don shuh ki ïing ki sem, ki khiew ki pliang, ki thlong ki synrei, ym don shuh ki jingthung jingtep ki jingri jingdup u khaw u kba u symbai u phniang. Haduh ba kim don khaw shuh wat tang ban shet ruh, daki taïew ki bnai ki hap ban bam daki sohlah khlaw ki pashor khlaw ki sla pathaw bad ki lungsiej kiba ki khot ka plung. Bad dei naka ne ka daw shibun ki shnong ki thaw kum ka Dummu Umtyrpeiñ bad Bandieñ rim te ki jah noh, bad daki spah ngut ki briew kila ïap naka daw jong ka jingthngan bad ka jingpang.
Pynban kaba pyn myllung kalong ba kat kane ka jingeh bad jingkordit ruh kim ïoh jingïarap ei ei naka liang jong ka sorkar Assam lane Meghalaya.
Kine haneng ki long tang ki jingjia hapdeng kine ki snem kiba nga la thoh. Mynta naduh ba ki ar sorkar kila rai ban pynbeit noh ïa u pud u sam hapdeng ka Meghalaya-,Assam ki Karbi kila sdang biang ban thombor ïaki briew jong ngi. Ki khang ïaki lynti ki syngkieng kim shah shuh ban leit ïew leit haat ban die ïaki mar rep jong ki sha ki ïew kiba don sha Meghalaya hakaba ki lah ban die ïakine ki mar ki mata jong ki. Naka ne ka daw ki shem jing eh bha namarba ki ïew kiba don shapoh Karbi Anglong Assam kim thied ïakine ki mar rep jong ki. Ki khang ruh ban lait wad dawai dashin ban phah sumar haba pang ba shitom shaki Hospital kiba don sha Meghalaya. Ki phah ïaki ban leit sha Assam hynrei ka jingeh ka long ba ki briew jong ngi kim sngewthuh ïaka ktien ka thylliej bad ka thoh ka pule.
Ki maham bad pyntieng pynsmiej ïaki briew jong ngi kiba kham pawkhmat bad kiba juh leit juh wan juh trei juh ktah shane sha Meghalaya. Ki khang ruh ban pynlong ïaki no kino ki jingïalang bad ban leit jingïalang shane sha Meghalaya. Ym tang baki maham hynrei ki don ruh ki briew jong ngi kiba shah bom shah shoh, kum kane ka jingjia ka haka 6.6.2023 haka shnong Tahpat haka ba ki arngut ki Khasi Pnar kiba kyrteng U Sam War bad u Six Lyngdoh kila shah kynjat shah kura haki Karbi haka Shnong Tahpat.
Bad mynta ka jinglong jingman sha kane ka thaiñ ka nang sniew nangsniew nangsniew shuh shuh tip aïu kan jia biang ïaki briew jong ngi.