Shillong, K’Lyngkot 07: Katba dang mih ki sngi la ïohi ba ka jingdheng kali hapoh ka nongbah Shillong, ka la nangjur nangjur ha kaba kane ka la wanrah ka jingeh ïa kiba bun ki paidbah khamtam kiba ïaid ba ïeng bad kumjuh ruh ïa kiba ñiah kali.
Kumba la ïohi ba ka jingjur palat ka jingdheng kali ka dei hi ha ki thaiñ Khyndailad bad kumjuh ruh ki bynta jong ka Civil Hospital Shillong.
Ka jingdheng kali kaba jubor bha ha kine ki jaka ka la long shaba palat ha kaba ki paidbah kin hap ban ap da ki kynta ban lait na kane ka jingdheng kali bad kane ka la wanrah ka jingeh kaba khraw bha ïa ki nongleit nongwan bad kaba la wanrah ruh ka jingeh ïa ki briew kiba ju pyndonkam bad ïaid lyngba kine ki lynti manla ka sngi.
Watla ka lynti ïaid kjat kaba don ha Khyndailad hadien ba la weng ïa kiba die madan ka la long kaba kylluid hynrei ka surok ïaid kali pat ka dang long kaba khapngiah na ka daw jong ka dheng kali kaba jubor bha manla ka sngi.
Kaei kaba ka sorkar mynta ka donkam ban thaw ka aiñ ka long ban pyrkhing noh ïa ka jingthied kali kaba manla ka sngi bad na ka daw jong ka jingbym don ka aiñ ka long ruh bad ka wanrah ruh ka jingeh ïa ki paidbah kiba ïaid lynti manla ka sngi, kumta donkam ban pyrkhing bha ha kaba ïadei bad ka aiñ ban thied kali kaba long kaba donkam bha ha kine ki por kiba mynta bad kumjuh ruh ka jingdonkam ban pynheh ïa ki surok ha ki jaka kiba long kongsan bha ha Nongbah Shillong.
