Katba nangmih ki Sngi ka Ïewduh ka la nangheh, nangbun kiba die jingdie, hynrei ka pla ka la ring rai khoh

Katto katne ki sngi mynshwa, U Conrad Sangma, u Myntri Rangbah ka jylla, ula leit jurip hi dalade ïa ka Ïewduh bad ula pynbna ïa ka jingbei pisa kaba T.6 klur bad sa kaba T.15 klur, na ka bynta ban tei pynbha ïa katei ka ïew, kaba heh duh jong ka ri Khasi Jaiñtia ha kane ka jylla Meghalaya.
Halor katei ka mat, ka donkam ba u Myntri Rangbah, un sngewthuh, ba ka Ïewduh, ka la nang heh, katba nang wan ki por, hynrei ka pla pisa jong ka, ka la nang rit bad nang duna bad rai khoh, namar ba ki don bun kiba shim kabu ban knieh noh, ïa ka kamai jong ka Hima Mylliem, na katei ka ïew.
Na kaei kaba ju ïa tip bha, na ka por sha ka por, ka long ba ka shuki jong U Syiem ka Hima Mylliem, ka dei ka shuki shna pisa jong kiba bun kiba don ha ka Executive Committee ne executive dorbar jong ka Khasi District Council bad kitei ki ju khmih lynti ïa ki bai burom bad ki bai bnai, ba kin leit sha ki Executive Member, ki Chief Executive Member bad wat sha ki MDC kiba don ha ka liang synshar bad kitei ki jingjia, ki kham jia bha, ha ki sngi lehkmen Khristmas snem thymmai bad ha shwa ki elekshon sha ki District Council bad kiwei kiwei kiba ym lah ban ñiew tang.
Ha kine ki khyndiat snem lei, ka la mih sa kawei ka jingjia kaba kham khyllah bad kata ka long, ba ïa ka jingkhrong ïew ruh, ka la knieh syndon ka District Council bad ka Hima Mylliem, kam lah ban ïaleh pyrshah, namar ba kan ktah ïa ka jing synjor jong ka shuki jong U Syiem jong ka Hima, lada ka don ka jingujor halor katei ka jingknieh jubor ïa ka khrong ka dan ne ka jinglum khajna.
Kam dei tang kata, ka don sa kawei ka mat bad kata ka long, ba na kitei ki daw haneng, ki Myntri jong ka Hima Mylliem ruh, ki bang bha ban ïaleh politik, namar ba ki tip bha, ba lada kin jop, kito kiba ki kham ïajuh ïajan bha, kumta ki kham laitluid ha ka trei ka ktah, ha ki kam Hima Sima.
Ka long kaba sngewtynnad ba u Myntri Rangbah, ula leit jurip hi dalade ïa kane ka Ïewduh bad ula leit ruh tang bad ki trai, khlem da ïawer lem ïa ki kliar na District Council bad haba ula bei pisa na ka bynta ban pynbha briew ïa ka Ïew, u dei ruh ban pynthikna, ba ka Hima Mylliem, nangne shakhmat, ka dei ban pynbiang ïa ka jing kheiñ ka jingdiah jong ka, halor kane ka T.15 klur, ba kin pynshisha ki chartered accountant, namarba ka jinglut bad ka jingmih, ka dei ban long kaba shai bad ïa katei ka jingkheiñ jong ki, ki dei ban pyni sha ka sorkar jylla, sha ka sorkar India, sha ki bank, sha ka District Council, khnang ba kin nang lah ban ïoh kamai shibun, haba ki biang ki jingkheiñ jingdiah bad ka jingpynbiang ïa ki jingkheiñ, kan khanglad ruh ïa kitei ki kam thombor jong ki MDC, kiba don ha ka bor, da kaba knieh noh ban khrong khajna ïa ka Ïewduh lane ïa kiwei ki Ïew, kiba hab ha ka jingpynïaid jong katei ka Hima, namarba haba don ka jingkheiñ kaba biang, kumta lada don kano kano ka jingleh bakla, kumta kan sa paw tyngkreiñ ïa ka jingjah jong ka pisa bad katei kan plie lad ban tih bniah, ïa ka jingleh bakla, lada ka dei na ki bor jong ka Hima ne na kiwei pat ki bor.
Lada kam don katei ka jingïatare ïa ka pisa jong ka Ïewduh, katei ka ïew dalade hi, ka lah ban ïeng sha ka jingtei kaba 5 ne 10 mala bad kan lah ban long ka ïew kaba itynnad tam ha ka jylla hi baroh kawei bad ïa ka jinglut kan lah ban siew dalade hi, khlem da donkam ïa ban leit beh ram na kiwei pat ne ban leit rah bowl na kiwei.
Sa kawei pat ka long ba ka jingknieh noh jong ka Khasi Hills Autonomous District Council (KHADC) ïa ka jinglum khajna napoh ka Ïewduh ka lah ruh ban long ba kam shaniah shuh ruh ïa ki bor pynïaid bad bor synshar jong ka Hima Mylliem namarba kane ka Ïewduh kadei ruh kaba mih bha ka jingïoh nong bad kumta ka lah ban long ruh ba ka pisa kaba la lum na ka bai khajna ka lah ban lait tuh sharud sha kiar ne ba ki Myntri kiba ïoh bat ïa ki shuki Executive Member ban khmih ïa ki tnat bapher bapher hapoh ka Executive Dorbar jong ka Hima Mylliem haba ka jingïalam jong u Syiem ka lah ban don ka jingpyndonkam bakla naba ha ka jaka ba ka pisa ba la lum na ka bai khajna kan poi sha ka Finance Department ne ka Tnat Pla tyngka jong ka Hima ka poi noh shawei ne ka jah ka ngam noh ha shiteng lynti kumta lada ka don kum kane ka jingjia dei ruh ïa ki bor badei khmih ba kin pynlong ïa ka jingtohkit ban lap ïa ki rukom treikam jong ki Myntri, namar lada shu peit nabar la ïohi ruh ba ki don ki Myntri ka Hima Mylliem kiba tang mar sien ïoh shong ha ka bor ki la ïoh ruh ban thied ïa ki kali kiba rem dor bha bad ban ïaid ha ki surok da ki kali ba tah iit ïong la kum ki Myntri sorkar jylla.