Katba long ka Block-I ka dei ban hap beit sha Meghalaya, dawa ki paidbah ha Mukroh

Jowai, Ïaïong 17: Ha ka jingïalang ba la khot pynlong da ka Hynñiewtrep Border Disputed Redressal Forum (HBBRF) ha kane ka sngi saitjaiñ 16 tarik u Ïaiong, 2022 ha shnong Mukroh West Jaiñtia Hills District, ki paidbah na ka thaiñ khappud jong ki 36 tylli ki shnong ka Block-I da kawei ka jingsur kiba rai ban dawa na ka sorkar ‘katba long ba ka Block-1 ka dei ban hap beit shapoh u pud u sam jong ka jylla Meghalaya.
La pynsngew ha kane ka jingïalang paidbah ba ka Elaka-Labang Nongphyllut Pangam Raliang, kala duh noh ïa u Dolloi jong ka tang namar ba la pynhap ïa ka shapoh ka Karbi Anglong District Assam, kum ki nongshong shnong kiba dei ki Pnar ki la dawa jur na ka Sorkar Jylla ba kane ka jingpynbeit pud ba ar Phase-II baroh kitei ki shnong Block-I dei ban pynwan biang (Re-tranfer) ïa ki shapoh ka Meghlaya.
Ïa ka jingïalang ha kane ka sngi la pynïaid da u Bah Aiborlang Shadap uba dei u MDC ka Barato-Mukroh, na ka liang u Woh M.M. Thaiang ula kren maitlynti halor ki mat jingjingdawa naduh ki por mynshwa ban pynwan biang ïa kitei ki jaka shapoh Meghalaya da kaba ula pynsngew ba ki don ki kot ki sla bad ki sakhi satar kiba biang ba kitei ki jaka ki dei ki bynta jong ka Meghalaya.
La ïakren ruh halor ka Memorandum of Understanding ba la ïa soi hapdeng u Myntri Rangbah ka Jylla Meghalaya, Conrad K Sangma bad u Myntri Rangbah ka Jylla Assam, Himanta Biswa Sarma ha ka 29 tarik u Lber, 2022 ha khmat ka Sorkar India ban pynbeit ïa u pud u sam ha ki 6 tylli ki jaka kata ha ka Phase-I.
Ka daw ka long ba ki ar Sorkar ki don ka jingthmu ban pynbeit pud sa ha ki 6 tylli ki jaka, ha kaba ka Block-I ka hap lang ha ka Phase II bad la pyntip ruh ba yn sdang ha u bnai Naitung mynta u snem. Ki nongai jingkren ki la kyntu ïa baroh ban ïatreilang bad sngewthuh jingmut na ka bynta kane ka kam im kam ïap jong u pud u sam.
Ki la pynpaw ba dei ban ïoh pynneh biang ïa ki jaka kiba ka Jylla Assam ka la khlad jubor na ka Hima Jaiñtia (Jowai Civil Sub-Division) bad pynhap jubor sha ka United Cachar & Mikir Hills District ha u snem 1951. Da kaba pynpaw ba kin phah jingthoh ruh sha ka Sorkar Meghalaya halor kane, ki la ong ba kin ym pdiang da lei lei ruh lada ka Block-I kam neh ha ka Jylla Meghalaya.
Nalor ki nongïalam ka Forum, la ïa donlang da ki kynhun sengbhalang bapher bapher ka Ri-Lum Jaiñtia ba kynthup ïa ka HYC, KSU, JSU, NHP nalor ki seng treimon sngewbha, ki nongïalam shnong, ki nongïalam Elaka, ki nongïalam ka Sur u Paidbah ka Bri U Hynñiewtrep ba kynthup ïa u Bah Rastingwel Thabah, Chairman, u Bah Thomas Passah bad kiwei pat.
La ïa donlang ban ïa mynsiem bad kyrshan ïa ka Forum da u Doloi ka Elaka Raliang, Ma C Lyngdoh, u Ma A Lipon, Chairman ka Synjuk Waheh Shnong Ri Jaiñtia, u Bah C Sungoh Chairman ka Forum, Secretary ka Labang Nongphyllut Pangam Raliang Council, u Bah BL Nongum, MLA barim ka Mairang bad u Bah Erwin K Syiem Sutnga, nongïasaid aiñ ba la rangbah bad paw khmat ka Jylla.
Na ka liang u bah Sutnga ula pynsngew ba la dei ka por ban pynkhreh noh ïa kane jingïakhun shaduh ka ïingbishar ba don burom jong ka Supreme Court namar ka sorkar kala pynkhieñ kumjuh ïa ka nongrim jong ka Six Schedule jong ka Council.
Ha ka juh ka por u kyntu ïa kitei nongshong shnong khappud ‘na ka bynta ka jaitbynriew dei don ka jingkitkhlieh halade bad ka jingïatylli lang kawei ban ïakhun ïa kane haduh ban da jop’. da kaba pynsngew ruh ba ka jaitbynriew Khasi Pnar ka don tang kumba 16 lak eiei.
Ula kynthoh jur ïa kane ka sorkar MDA ba mynta kaba la leh jubor ïa kane ka jingïasoi memorandum of understanding (MoU) khlem ka jingtip jong kiba bun ki nongshong shnong ha ki jaka khappud bad kane ka jingsoi (MOU) hapdeng ki ar myntri rangbah (Meghalaya-Assam) ka la long kum kata ka ‘Mait’, ‘Ot’, pynsah ‘Umdum’ ïa u paidbah ong u ma Sutnga.