Katba ka sorkar ka kren ïa ka jingsuk, ka thaw hi pynban ïa ka thma da ka jingban beiñ: HNLC

Shillong, Risaw 20: Ka seng Hynñiewtrep National Liberation Council (HNLC) kaba la shah kheiñ beaiñ ka la pynrem jur ïa u Symbud Myntri Rangbah ka jylla u ba khmih ïa ka tnat Home (Police) u Bah Prestone Tynsong, ha kaba ka la kynnoh ïa ka sorkar ba ka la thaw ïa ka thma lyngba ka jingban beiñ katba ka kren pat ïa ka jingsuk.
Kane ka jingkynthoh ka la wan hadien ka jingshah kem jong ki 6 ngut ki samla dangshen haba ïadei bad ka jingbuh ïa u Improvised Explosive Device (IED) ba la ïoh ban kurup na ïew Umsning kaba ha Ri Bhoi District ha ka 12 tarik mynta u bnai.
Katkum ka seng HNLC, kum kine ki jingkem ki dei ki kam pynshitom ba la leh da ka jylla da kaba aidaw ba ka dei hapoh ka jingkynnoh ba ki don ka jingïadei bad ka HNLC.
Ha kyrwoh ha ka sngi Nyngkong, u general secretary ka HNLC u Bah Sainkupar Nongtraw u la ong, “Ka jingkren da u Symbud Myntri Rangbah uba khmih ïa ka tnat Home (Police), u Bah Prestone Tynsong, kam dei eiei hynrei kadei ka jingpyni ïa ka jinglong tohmet jong ka sorkar bad ka jingarsap. Ka long kaba sngew thamula ba kito kiba kren ïa ka jingsuk kidei ruh maki kiba thaw ïa ka thma lyngba ki jingban beiñ. Katba ka jylla ka leh mynleh ban ong ba ka jingkhang ka plie na ka bynta ban ïakren ïasuk, ka ïaibteng pat ban kynjat ïa ki jingkhang jong ki samla lui lui ka jaitbynriew Hynñiewtrep, khamtam ha Ri-Bhoi District, da kaba aidaw bad kynnoh ba ki don ki jingïadei bad ka HNLC.”
“Ngi pynpaw hangne ba ki samla kiba shah kem ha ki pulit ka Ri-Bhoi kim don jingïadei eiei bad ka seng HNLC la ka long ha kano kano ka bynta. Kine ki jingkem kim dei eiei lait na ka jingphah ne kyrshan ka jylla ban ban beiñ kaba long ka jingpyrshang ban thaw ïa ki jingtieng, ban pynphriang ïa ki jingkulmar bad kaba pynshisha ïa ka jingpulom ka sorkar ban pynbeit ïa ki kam kiba shisha kiba mad da ka khyndew ka shyiap ne kaba ktah ïa ka jaka puta jong ngi,” u la bynrap.
Ka HNLC ka la kam ruh ban ong ba ka long kaba lehraiñ ïa ka jingleit kem biang ïa ki samla kiba dang shu shah pynlait na phatok, ha kaba kane ka pyni ïa ka jingduna ka mon na ka saiñ pyrthei bad ki jinglong hok jong ka. Ka seng ka kynnoh ïa ka sorkar ba ka pyndonkam ïa ki pulit kum ki tiar ban pynpra ïa ka mynsiem jong ki paidbah ka Hynñiewtrep.
Ka HNLC ka la kob ruh ïa ka sorkar jylla haba ïadei bad ka jingslem ban pynbeit ïa u pud u sam hapdeng ki arjylla bad ki jingïakajia ha u pud u sam ka ri kaba la long ka daw ki jingjynjar, ki jingshah pynsaphret bad ka jingïapait ïa pra hapdeng ki paidbah.
“Kat bym pat lah ban pynbeit ne kren ïa kine ki kam kiba long ka hok ka nongrim, kata ka jingkwah ïakren ïasuk kan ym shongdor eiei,” bynrap u Bah Nongtraw.
Haba phai halor ka kam Them Metor kum ka nuksa, u Bah Nongtraw u la ong, “La ai ki jingkular, la pynlong ki jingïalang, la buh ki jingai por kiba la shu pynjlan khlem kut shuh, hynrei haduh mynta kam shym la mih kano kano kaba bha ne kaba la leh. Ka sorkar ka ïaibteng ban pynjlan ne buhteng watla kane ka dei tang ka mat ka phang jong ka jylla. Kine ki jingleh ki pyni ïa ka jingbym kwah bad don mon bad long khuid ka sorkar.”