Katba dang im ka jingnang jingtip kam ju kut lano lano ruh, ong u Dr. Ricky

Shillong, Naiwieng 08: Ka seng Samla Wahingdoh ha ka Sngi Thohdieng ka la pynlong ïa ka jingpynkup burom kaba 30 ïa ki samla pule kiba pass jong ka shnong ne ka 30th Educational Award 2024 ha kaba ïa kane ka prokram la pynlong hapoh Community Hall, ha kaba ki khynnah pule naduk matric haduh ki professional courses, ki la shah pynkup burom.
Ha kane ka prokram ba la pynkupburom ïa kumba 30 ngut ki samla pule, u MP ka Shillong parliamentary seat u Dr. Ricky A J Syngkon u la long u kongsan, ha ka jingdonlang u MLA ka North Shillong u Bah Adelbert Nongrum bad u MDC ka Mawkhar -Pynthorumkhrah u Bah P N Syiem bad u Rangbah Shnong u Bah R S Marbaniang nalor kiwei kiba la shah khot.
Kum u Kongsan haba ai jingkren u Dr. Ricky A J Syngkon MP ka Shillong u la ong ba kane ka jingpass bha ki khynnah, kiba kmen tam dei ki kmie ki kpa. U la ong ba kane kan dei ka sngi sahkynmaw ïa ki kmie kpa bad ki khun samla. Haba batai shaphang u nombar 30 u MP u la ong ba u nombar 30 u dei u ba thew ïa ka sap ka phong, ka mynsiem bym ju duh jingkyrmen, u 30 u thew ïa ka jinglong janai jong u Blei, u pynpaw ïa ka ïa kaba biang ba la buh da u Blei, u 30 u dei u nombar ban pynkynmaw ban pyndonkam ïa ka jinglong creativity bad ka jingkmen.
U la ong ba lada ym dei na ki nonghikai yn ym long kumne kumba ki samla pule ki long, kumta ym dei ruh ban klet ïa ki nonghikai kaba nyngkong kiba dei ki Kmie Kpa.
U la ong ba ym dei ban klet ïa ki jinghikai naduh na la ïing shaduh sha skul. U la ong ruh ba ym lah ban kiew shaphrang lada ym don ki nongrim ba skhem.
Haba batai shaphang ki nongrim u MP u la ong ba ki nongrim kiba skhem tam kidei ka jingshep tieng ïa u Blei, ka jingburom ïa ki Kmie Kpa, ki Nonghikai, bad u la ong ruh ba ka jingnang jingtip kam ju kut lano lano ruh.
“Ka jingnang jingtip ha kane ka juk mynta kaba ima shisha naba ka la khlaiñ palat ïa ka jingpynlong commercialization ïa ka pule puthi, wat pyndonkam than ïa ki guide book naba kane ka pynhiar ïa ka ri bad ka jaitbynriew. Ym dei ban shaniah than ha ka internet naba ka jingnang jingtip ba long shortcut ka long ka jingma.
Ïa ka jingnang jingtip dei ruh ban sam sha kiwei naba ka imlang sahlang ka khmih lynti na phi ki samla pule,” ong u MP.
U la ong ruh ba kum ki khun samla dei ban don ka jingïohi jingai bad lada ym ïohi jingai ka ri bad ka jaitbynriew kan sa jah rngai.
Katba na ka liang u Bah PN Syiem uba long u MDC ka thaiñ bad u Deputy CEM ka KHADC haba kren u la ong ba ka jylla ka donkam ïa ki nongïalam, bad u la ai khublei ïa ka Seng samla kaba la bteng haduh 30 snem ban pynkupburom ïa ki samla. “Kum u Deputy CEM ngi la pyrshang ban ithuh noh da ka aiñ ïa ki seng samla, ki seng longkmie. Dei da ka jingbsuh, ban ithuh bad ban pynkupbor ïa ki seng samla ba la shna ïa ka Administration of Elaka Ammendment act 2024 kane ka la long aiñ bad la ithuh da ka aiñ ïa ki seng samla bad seng longkmie,” u la ong.
“Ngi donkam ki nongïalam kiba ïohi jngai naba kumba long mynta bun ka spah ka leit shabar naba ngim don ki nongthaw aiñ kiba biang,” ong u Bah P N Syiem.
Ha kane ka prokram la ioh ruh ka jingkren na ka Dr. Sonita Khongwir, u Rangbah Shnong Babu R S Marbaniang bad kiwei.
Ha kane ka prokram na ka liang u Kongsan, bad kiba la shah khot sngewbha ki la sam ïa ki khusnam ha ryngkatlang bad ka pisa sha ki samla ba pass bha, la don ruh ki jingrwai bad jingshad na ki khun samla jong ka shnong Wahingdoh nalor kiwei pat ki jingpynbyrnia.