Katba da khrong na ki dukan ha Lastop, ïoh bat ka KSU ïa 4 ngut ki Mulsim ba rung beaiñ

Shillong, Nailar 18: Ka Khasi Students’ Union Laban Circle ha ryngkat ka jingïadonlang ka KSU Mawprem Circle ka la ïoh ban pynphai noh ïa 4 ngut ki khar Muslim kiba kynthup ïa 2 ngut ki khynnah ba rung beaiñ sha ka jylla.
Ïa kane ka longkmie Muslim na lap nyngkong na Laststop, Laban katba ka dang khrong pisa bad ka khun ong ka na ki dukan ha Laststop. Ynda la tohkit la tip ba ka dang shu wan dang 2 sngi sha Shillong bad kam shim don ka EPIC ne ka Voter ID ban pynshisha ïa ka jinglong trai shnong jong ka lait noh tang ka Aadhaar card ba ïoh na Uttar Pradesh.
Hadien kane na ka liang ka Seng ka la pyntip sha ka Laban Police Station bad ha thanad ha kaba ka la phla ba ka sah ha Cantonment area ha Jhalupara bad mar kumta na ka liang ki pulit ka Laban ki lah phah noh ïa kane ka briew sha Jhalupara Outpost ha ryngkat ka jingsynran na ka liang ki dkhot ka Seng.
Ynda la ïalam sha ka ïingsah jong kane ka Muslim ha Cantonment area ha Jhalupara la lap ba don sa u lok bad ka khun jong ka kiba sah beaiñ ha ka jaka Cantonment da kaba shna da ka ïing tap shiliang khlem ïoh jingbit nangno nangno ruh.
Marmar kumta ka Seng ha ka jingsynran lang bad ki pulit ka Jhalupara Outpost ki la beh ïa kine ki khar muslim da kaba pynkit ïa ha ki kali ba kin leit phai noh sha ka shnong kaba ki wan.
Na ka liang ka Seng ka bynñiaw ba ka Anti-Infiltration Cell jong ki tnad pulit ki long kiba synjor haduh katta katta ba kum kine ki briew ki ïoh rung suk bad sah beaiñ sha ka jylla bad ha kajuh ka por na ka liang ka seng ka la ong ba lada khlaiñ ka Anti-Infiltration Cell kine ki briew kin ym lah ban ïoh rung beaiñ hynrei namar imat bym ju don briew ne bor pahara.
Na ka liang ka Seng ka dawa ba donkam ban pynkhlaiñ ïa ki tnad jong ka Anti-Infiltration Cell bad ka Sorkar ka dei ban shimkhia halor ka ishu influx lem kumta na ka liang ka Seng kam banse ban shim ïa ka aiñ ha la ka kti bad ïada ïa ka ri bad jaitbynriew na ka jingrung kyrthep ki bar jylla, ong ka kyrwoh na u Jason Laloo, General Secretary KSU Laban Circle.