Ka jingai jingshakri jong ka Meghalaya Energy Corporation Limited (MeECL) mynta la san phew tylli ki snem ïa ka jylla Meghalaya lah ban ong ba ki don ki khep kiba kane ka shlem sam bording ha ka jylla baroh kawei ka la ïoh ïa ki jingïaroh bad ïa ki jingshah kynthoh.
Ka jingrang tyrkhong jong ka suiñ bneng ha kine ki khyndiat bnai ka la pynsuhsat ïa kane ka shlem sam bording jong ka jylla namar ka jingpynlip ïa ka bording kaba la neh 8 kynta ha ka shi sngi. Hynrei watla u slap u la sdang ban pyndap suki pa suki ïa ka pung Umïam hynrei ka MeECL kam pat lah satia ban khate ïa ka por pynlip bording.
Ki paidbah kiba hap ban siew dep ïa ka bai thang bording manla u bnai khlem da pynsah wat tang shi naïa ruh ki khñium ïa ka jingbym lah jong ka MeECL ban ai ïa ka jingshakri kaba paka. La jan baroh ki jait kam ba ki paidbah ki trei ki la mad ïa ka jingsuhsat na ka daw ka jingpynlip bording.
Ka jinghiar ka um ha pung Umïam ka la nang pynkhuslai shuh shuh ym tang ïa ka MeECL hynrei wat ïa ka Sorkar Jylla kaba hap ban shu thied ïa ka bording na kiwei pat ki shlem pynmih bording nabar ka jylla tang ban pyndap ïa ka jingdonkam jong ki paidbah nongshong shnong.
Ha kum kane ka juk stad mynta, ki don da kiwei pat ki lad ki lynti ba ki paidbah ki lah ban ïoh ïa ka bording wat ha ka por ba la pynlip ïa ka bording ha ka jylla baroh kawei hynrei lada bishar bniah ïa kane, tang ki longing kiba bit ba biang bad kiba don ka spah ka phew ki lah ban pynbiang ïa ki mashin ba lah ban pynmih bording hynrei u duk u suk, u kup shiliang u sem shiliang u hap ban shu shong khlem ka bording.
Ka MeECL ka la dei ban pynjanai ïa ka jingtreikam ka jong ka, namar ki jylla sha ri thor kiba pyndonkam kham bun shah ka bording ban ïa ki jylla rilum ki tip kumno ban kynshew lypa ïa ka bording khnang ban ym mad ïa ka jingkyrduh bording ha ka por ba rang tyrkhong ka bneng.
Kum ki nongshong shnong kiba don ka jingkitkhlieh, ki dei ruh ban pyrkhat ïa ka bha ka miat jong ka jylla baroh kawei ban ym pyrshah than haba ka Sorkar ka tyrwa ban tei ïa ki shlem pynmih bording ha kino kino ki bynta jong ka jylla namarba katba nang bun ki shlem pynmih bording katta ruh ki paidbah kin ym mad ïa ka jingshong dum ha ka por mynmiet.
Mynta, ngi ïohi ruh ba ka MeECL ka la shah pynlehrain ha la ki nongtrei kiba la pynlong da ka jingïakhih kum ka dak ban pyrshah ïa ka jingpynslem ban siew ïa ka tulop. Ka long kaba lyngngoh haduh katta katta ba katkum ka MeECL kaba ïoh lum ïa ka bai thang bording da ki klur tyngka tang na ki paidbah (khlem da kheiñ ïa ki Karkhana kiba heh kiba donkam ïa ka bording da ki phew Unit) ka shano ka buh ïa ka pisa kaba dei ban siew ïa ka tulop jong ki nongtrei.
Kane kam dei shuh ka jingïakhih kaba nyngkong jong ki nongtrei jong ka MeECL kiba hapoh ka shatri jong ka Coordination Committee of Registered MeECL (Employees) Associations and Unions (CCoRMAU) hynrei kane ka la long pynban kum ka dustur ba manla u snem ki nongtrei kin pynlong ïa ki jingïakhih ban dawa ïa ka tulop.
Kumba ka long mynta ka MeEC ka don hapdeng ka jingsah ram ba ka dei ban siew sha ka NEEPCO bad sha kiwei kiwei de ki kompeni pynmih bording kiba ka MeECL ka thied ïa ka bording bad lymda dei ka jingkyrshan jong ka tnat Sam Bording jong ka Sorkar Jylla kan buh jingeh ïa ka MeECL ban pyntyllun shakhmat ïa ka jingai jingshakri sha ki paidbah nongshong shnong jong ka jylla.
