K a jingmih ka jingjia kawei hadien kawei pat ka la pynlong ïa ki nongshong shnong ka jylla khamtam eh ïa ki shnong kiba don ha nongbah Shillong ban kylli kaei eh ka daw kaba kum ka Jylla ka hap ban mad ïa kine ki jingtynjuh kiba harukom kiba la pynking bad pynktha khlieh ym tang ïa ki nongsynshar ha ki shnong ki thaw, hynrei wat ïa ki bor pulit, ïa ka sorkar jylla bad khamtam eh ïa ki kmie ki kpa ha man la ki thliew iing jong ka jylla.
Dang ha kine ki shisngi arsngi la phriang ki khubor ha ki rynsan social media ïa ka jingshah dung thyrnia injek kawei ka khynnah ha ki briew bym lah ban ithuh katba ka dang ïaid lynti ka la pynkyndit haduh katta katta ïa ki nongshong shnong haduh ba ka la pynlong ïa ki kmie ki kpa ba kin ym sngew shngaiñ shuh wat ban phah hi ïa ki khun kiba la heh ban leit sha ki jaka pule. Kane ka jingjia ym tang ba ka wanrah ïa ka jingartatien ïa ka jingshngaiñ jong ki nongleit nongwan hynrei ka la paw ruh kum da kawei pat ka dur kata ba ka jingdon ki riew runar imat i kumba ka la long laitluid namar kim salia shuh wat ban leh ïa ki kam runar mynsngi mynshai khlem salia bad khlem don shuh ka akor ka burom ne ka jingpyrkhat ïa ka bapli.
Kumba long mynta, ym pat lah ruh ban tip kaei ka daw tynrai kaba pynlong ïa kine ki runar ban leh ïa katei ka kam pohdor namar haduh mynta hi na ka liang ki bor pulit ruh ki dang thwet jur ban lap dien ïa kine kiba donkti. Na ka liang ka tnad pulit kam dei satia ban ai jem ïa kum kine ki jait briew hynrei ban leh syndon da kaba tyngeh khnang ba kiwei pat kin thngad syndon.
Mynta lei lei jan man ka sngi ki khubor kiba phriang ha ki social media kidei beit ba shah tuh, shah pynap tiar pynmynsaw, shah byrngem, shah leh be-ijot bad bun kiwei kiwei ki jingjia haduh ba la i jlep ban ngiah shoin ban peit. Tangba kine khatduh ki kut beit da kaba kynnoh ba ïa kine ki kam la leh da ki briew kiba kyrni ha u drok. Hynrei lada wad bha lehse ka lah ban long bad ka lah ruh ban ym long ba ka jingjur kine ki kam kadei beit na ka jinglyngkar eh ki longiing longsem ha kaba ki kmie ki kpa kim buddien shuh ïa ka leit ka wan jong ki khun, khamtam ïa ki khun kiba la sdang ban khie samla.
Nangta kawei ruh ka jingïoh mon palat ha ka liang ka pisa kumjuh ruh ka jingïoh ban rah mon ïa ki kali, ki bike ne scooty ka la nang pynsuk shuh shuh ïa kito ki khun kiba kwah ban leh ïa ki kam ki bym sngewtynnad ha ka imlang sahlang.
Ka por ka dang biang palat ïa ki nongshong shnong khamtam eh ïa ki kmie ki kpa ba wat tyngkai ïa u diengsympat (kaba mut ka sneng ka kyntu kaba man ka por) katba ka por ka dang pahuh namar ka jingkloi jongphi ban khyrwit katba dang biang ka por kan pynbeit thoin ia ka rukom im jong ki khun jong phi hi.
