Nongstoiñ, Nohprah, 06: Ka jingpynmih soh ñiamtra jong ka West Khasi Hills ha ki snem ba mynshuwa ka jur bha khamtam naduh u bnai Naiwieng ter ter haduh u bnai Rymphang. Hynrei katba nangmih ki snem ka jingpynmih soh ñiamtra ka la nang hiar arsut ha man la ki shnong, ong u bah H.Snaitang uwei na ki nongshong shnong bad nongrep ka thaiñ Langpih.
U bah Snaitang haba ïakren bad u nongthoh khubor u la ong ba ha ki snem ba mynshuwa, ka jingmih na ka jingshalan ïa u soh ñiamtra ba u la thung ha kper, ha ka shi aïom kam duna ïa ka sanphew haduh hynriew phew hajar tyngka. Hynrei katba nang slem ka jingpynmih soh ka nang duna bad ha kine ki snem wat la ki dei ki snem kiba ka dor jong ki soh ka la nang kiew, pynban naduh ba sdang ban kheit haduh ban da kut ka aïom lada ka mih bun eh ruh arphewsan haduh laiphew hajar tyngka.
U la ong ruh ba imat ka jingkiew sted jong ka jingkhluit ka suiñ bneng ka dei ka daw ba kongsan kaba pynlong ïa ki dieng soh ñiamtra ba kin duna bha ka jingsoh. Nalor kata u la ong ba kaba lyngngoh ka long ba katba u dieng soh u nang heh, ki khñiang ki sngew tynnad ban bam bad shisien ba u khñiang u la ïoh lad ban ksam ha u dieng soh ñiamtra, ym lah shuh ban leh ei ei namar lada thep da ki dawai pynïap khñiang ha ki jaka ba u ksam ruh kam rung satia bad lada ka rung ruh u khñiang u ksam noh sha jrong, kumta ka shem jingeh haduh katta katta ban ïada na kitei ki jait khñiang.
Utei u rangbah u la ong ruh ba ki nongshong shnong ha katei ka thaiñ kum ka shnong Umtap Ïewnongma, Madanjaïaw, Umwali, Umyiap bad Mawdiangsnam, ki dei kiba sngew tynnad bha ban rep soh ñiamtra bad ha ki snem ba mynshuwa naduh ka taïew ba khatduh jong u bnai Naiwieng, ki kper ki phrah ha kitei ki shnong ki phyrnai khrek da ki soh bad haba peit na jngai da ihun shisha bad da ijawdud haduh katta katta. Hynrei ha kine ki sngi bun na ki kper ba ki rep soh ki la dap pynban da ki synsar.
Ha kajuh ka por u la ong ba lada ïanujor ïa ka jingmih u synsar u kham pynmih pisa kloi, namar ba tang hadien ar snem lada dei ka jaka rep kaba heh kaba lah ban pynmih shihajar kilo shaneng te lada dei ka snem ba ka ïew synsar ka ïaid bha ka jingmih ruh ka la bun bha.
Hynrei lada long kumba long mynta u snem kam myntoi satia namar ka dor jong shi kilo u synsar ka dang ïa ryngkat bad ka dor jong lai tylli ki soh ñiamtra kiba rit bad lada thung dieng soh ha ka kper kaba lah ban pynmih shihajar kilo u synsar. Lada dei ba ki nongrep ki sumar bha ïa ki dieng soh ka jingmih na u soh ka la palat ïa ka shilak tyngka, kata ruh lada ka jingsoh ka duna hynrei lada dei ka snem ba u soh bha lei lei ka jingmih kan palat ïa ka arlak tyngka.
