Kano kano ka kynthei kaba ioh lok bar jylla ka dei ban mih noh na shnong, maham ka Dorbar Shnong Iewmawlong

Nongpoh, Nailur 27: Tang hadien ka jingshah pyniap dusmon jong ka samla lud naka shnong Iewmawlong ha u bar jylla kaba la jia haka sngi nyngkong jong ka taiew, ka Dorbar Shnong jong ka Iewmawlong mynta ka sngi kala maham tyngeh ïaki thei samla napoh shnong kiba ioh lok bar jylla ba kim dei shuh ban sah ha shnong hynrei ki dei ban mih bad leit bud syndon ïa u.
Haba kren sha ki nongthoh khubor naka liang u Bah Vicky Syngkli Rangbah shnong u la ong ba kum ka shnong kam kwah ba ki thei lud khasi kin shah pynbiej haki bar jylla bad naka liang ka Dorbar Shnong Iewmawlong naduh u snem 2014 kila shim ïaka rai ba yn ym shah ba ki thei khasi naka shnong kin ioh lok bar jylla bad kum ka shnong kan nym don ka jingkitkhlieh shuh ïaki.
U la ong ruh ba ka jingjia haka shnong Pahamsyiem kala pynpar ñiangkhriat ïa kiba bun ki paidbah ïaka rukom pyniap ba shyrkhei jong u bar jylla ïaka samla khasi da kaba ot ryndang bad dung ruh da ka tari wat hakapor mynsngi ha surok shnong, kumta naka liang ka shnong ka maham ïaki samla khasi ha shnong ba ki dei ban da jied janai ïa u briew ha kaba ïadei bad ka shongkha shongman, ba kum kitei ki jingjia kim dei shuh ban dang jia nangne shakhmat bad maham ruh lada kano kano ka kynthei ka ioh lok dkhar ka dei ban mih syndon na katei ka shnong kumba la rai haka Dorbar bad ban leit bud syndon ïa u ba kum ka shnong kan nym don shuh kano kano ka jingkitkhlieh.