Kane kam dei ka jingïaleh ka VPP ne u Bah Ardent hynrei jong ka jaidbynriew: Ardent

Shillong, Jymmang 28: Ka jingïakhih shong shah thngan u Bah Ardent ha ka sngi u Blei ka la kynjoh sha ka sngi kaba 6 bad ka jingshah thngan jong u ka la palat ïa ka 130 kynta, haba kren ha kane ka sngi sha ki paidbah kiba la ïalum bad ai khublei ïa u u la ong ba kane ka jingïakhih kaba u la sdang kam dei satia kaba nongkynti ka VPP ne u Bah Ardent hynrei ka dei ka nongkynti ka jaidbynriew.
“Wat sngewthuh bakla ba kane ka jingïakhih ka dei jong ka VPP ne jong nga hynrei ka dei jong ka jaidbynriew dei namar kata ka daw naduh ka sngi kaba nyngkong jong ka jingïakhih ngim shym la pyndonkam satia ïa ka lama party khnang ba kan ym don kano kano ka jingsngew khohñioh party hynrei na baroh kin sngew trai ïa kane ka jingïakhih, ” u la ong ïa ki paidbah kiba ker tawiar ka data ba u shong bam ai khublei.
“Dei na kane ka jingïakhih ka dei jong ka jaidbynriew ba ngi la pynïeng da ka Lama ka Revolution Ïada la ka Ri kaba ngi la sdang ha ki snem ba mynshuwa bad ngim shym jied ban pynïeng ïa ka lama ka VPP,” u la bynrap.
Lah ban sakhi ba na kane ka sngi ka jingwan mih u paidbah ban wan ai jingkyrshan ïa kane ka jingïakhih ka long kaba jur bha namar naduh mynstep haduh ka por 11 baje ki paidbah ki dang ïalum ban ai khublei ïa une u nongïalam ka jaidbynriew.