Kane ka Sorkar ‘lada ïakhih ïoh pisa, lada sngap jar ym ïoh’ ong ki Home Guards Volunteer

Jowai, Naitung 17 : Ki nongtrei Home Guards Volunteer kiba trei na ka bynta ka khlam Covid-19 ha kine ki snem ba la dep 2020-2021 hapoh ka West Jaiñtia Hills kiba kynthup haka shnong Saphai, Raliang, Amlarem, Phramer, Ummulong bad Jowai, mynta ka sngi kila pynsngew biang sha ki tyngdong skhor ka sorkar ba kan siew dep noh ïa ka pisa kaba dang sah.
Katkum ka jingïathuh jong kitei ki nongtrei Homeguard West Jaiñtia ha u Mawphor la ong ba ki don kumba 112 ngut kum ki Home Guards Volunteer hapoh ka West Jaiñtia Hills District kiba la dep ban trei ïa katei ka kam haduh 280 sngi ha ka dor T.550 tyngka shi sngi, hynrei haduh mynta ka bai nong kaba dang sah ka long sa kumba 30%, don napdeng jong ki kiba dangsah sa 20 hajar tyngka ka pisa bad ki don kiba 30 hajar tyngka.
Shuh shuh kitei ki Homeguard Volunteer kila ïathuh ba ka jingïakut jong ki ban trei ïa kane ka kam ba la khot bad ka ophis Homeguard and Civil Defense ka long naduh ka 27 tarik u March 2020 bad pynkut ha ka 31 tarik u December 2020.
Halor kane ka jingbym pat dep siew lut ïa ka bainong, kila buh jingkylli ïa kane ka sorkar da kaba ong “balei lada ki don ki jingïakhih ka sorkar ka kloi ban siew ïa ka pisa hynrei lada ki sngap jar pat kane ka sorkar kala leh kum bym tip eiei ïa ka kamram ban pyndep” bad kane ka paw shai ïa ka jingdkhot treikam jong kane ka sorkar, la ong kitei ki nongtrei Home Guard.
Da kawei ka jingmut kila kren shai ba lada ka sorkar kam lah ban pynbeit ïa kane lane siew dep noh ïa ka ïa ka bai nong sngi kaba dang sah, kim banse ban shim noh da kawei pat ka sien jam ne ka jingïakhih ba tyngeh pyrshah ïa kane ka sorkar.
Kitei ki nongtrei Volumteer kila pynsngew ba kane ka jingleh ka sorkar ka long kumba pynkheiñ ïa ka hok jong ki kaba ki dei hok ban ïoh, namar ïa kane ka jingeh kaba ki ïa kynduh kila dep ban ïaishah la ar snem tam mynta.
Kumban shu pynkynmaw ba ki nongtrei Home Guard Volunteer kiba dang sah bai nong hapoh ka West Jaiñtia Hills haka 15 tarik jong u Nohprah 2021 kila thmu ban khang tala syndon ïa ka ophis Home Guards and Civil Defence ha Jowai, hynrei da ka jingkhanglad jong ki pulit bad ki Home Guard la lah ban pynpulom noh ïa ka jingkhang tala ha ryngkat ka jingwan hiar jong u Magistrate bad ki pulit.
Ha katei ka jingthmu khang tala kala don ka jingïakhun kaba jur bha hapdeng kitei ki Home Guard Volunteer kiba thmu ban khang tala bad ki pulit.