Kane ka long ka nuksa ba ka jingkyrmen ïa ki Shnong bad ki talawiar ka Wah Myntdu

Jowai, Ïaïong 08: Mynta ka sngi kaba dei ruh ka sngi ïew ‘Musiang’ ki kynhun jong ki nongthied nongpet kila ïamih sha ïawmusiang da kaba rah lang da ki pla ïew ba la suh kyrpang, ki khoh, ki shang bad ki Tiffin la jong na ka bynta ban leit thied ïa ki jingdonkam na ïew.
Kine ki kynhun ki kynthup ïa ki dkhot ka All Jaiñtia Muster Roll Workers Labour Union, Jowai Unit, ha ryngkat ki nongïalam ka Khooid Ya Ka Wah Myntdu, ki nongtrei Mid Day Meal bad ki ASHA kiba la don ka jingkitkhieh ban long kum ki nuksa ïa kiwei ban bym pyndonkam pla plastic shuh ha ka jingïatheid ïapet hapdeng ki nongdie bad ki nongthied.
Na ka liang katei ka kynhun kala pynsngew ba kane ka long shi bynta ban ïada na ka jingmih jong ki ñiut ha kylleng ki bynta jong ka sor Jowai namar kumba long mynta ki ñiut ha Jowai katba dang mih ki sngi ki dang bun shuh shuh na ka jinglumthup ba shi jaka.
La sakhi ba ka rukom leit ïew khlem pyndonkam pla platic kala pynkmen ruh shi katdei ïa ki nongdie jingdie ba kim donkam shuh ban sei ïa ki pla Plastic, ha ka juh ka por ka long ruh kum ka lad ban ïada ïa ki shnong ki thaw bad ki talawiar jong ka Wah Myntdu kaba dei ka nongbsa umbam ïa ka sor Jowai.
U President ka Khooid Ya Ka Wah Myntdu ma Khroo L Pariat haba ai jingkren sha ki lad pathai khubor ula pynpaw ka jingsngewnguh ïa baroh kiba la wan ban ïadonlang ha kane ka sngi bad ban ai jingpynshai sha kiwei de halor ka jingkhuid jingsuba.
“kala dei ka por ïa ki nong shong shnong ban don ka jingkit khleih halade khnang ban teh lakam ïa ka jingpyndonkam pla plastic bad ki klom um plastic kiba lah ban ktah ïa ka jingkoit jingkhiah”, ula ong ruh lada don makna ka pisa khlem ka koit ka khiah ka long pat ka jingma ha ka jingim.
U ma Pariat ula kynthoh jur ïa ka sorkar bad ïa ki nongmih khmat da kaba ong ba ka por kam donkam shuh ban shañiah ha ki namar ïa ki hukum (order) bala pynmih na ka por sha por da ki bor District hynrei ki kam pat kim ïadei satia. Kumta u kyrmen lyngba kane ka sngi ki nongshong shnong jong ka Ri-Lum Jaiñtia ki sangeh noh ka jingpyndonkam ïa ki pla plastic.
Ka kong ong Dayoo Ïakai, President All Jaiñtia Muster Roll Workers & Labour Union (Central Executive Committee) Jowai kala buh ka jingkyrpad ïa ki nongshong shnong ba kin ïasnoh kti lang bad kane ka jingthmu ban nym pyndonkam pla Plastic shuh nangne shakhmat, na ka bynta ka jingshngaiñ jong ka mei mariang.
Lala ong ruh ka jingsah kut ki ñiut ha Iawmusiang Jowai kala pynlehraiñ shisha ïa ka Ri-lum Jaiñtia hi baroh ka wei namar ïa ka sor Jowai la tip ïa ka kum ka ïit khmih kaba lah ban ïohi da baroh kiba wan shapoh ka Ri-Lum Jaiñtia.