Shillong, Jylliew, 23: Ka Executive Committee ba la ïalam da ka Khasi Hills Democratic Front ha Khasi Hills Autonomous District Council (KHADC) ka la shim ïa ka rai ban shimkhia bha ïa ka jingeh jong ki paidbah ha khappud kiba ïakynduh jingeh na ka jingïakajia pud hapdeng ka Jylla Meghalaya bad ka Jylla Assam kiba dang hap hapoh u pud u sam jong ka KHADC.
Ka Sorkar Meghalaya bad ka Sorkar Assam ki la pyndep ïa ka jingïapynbeit pud ha ka wat kaba nyngkong bad mynta ka kynti la pynsdang sa ïa ka wat kaba ar hadien ba la thaw biang ïa ki Regional Committee ban ïapynbeit sa ïa ki hynriew tylli ki jaka kiba dang don hapdeng ka jingïakajia pud.
“Na ka liang jong ngi, tang shu dep ka Dorbar Mang Tyngka ngi don ka jingthmu ban leit jngoh ïa kito ki shnong kiba shah pynwit ha ka leit ka wan, kiba shah pynthud ha ka leit rep leit riang, ka kam khaïi bad kiwei kiwei bad kiba shah pynthud ha ki kam pynroi,” u la ong.
“Khnang ban tip ïa ki bor kiba wan pynthud, tad ynda la ïakynduh ïa ki nongshong shnong ngin sa ïoh jingshai namarba haduh mynta ngim pat ïoh jingshai bha,” u la ong bad bynrap, “ha ka sngi ba la jied ïa u CEM ba thymmai, ngi la ong ba daleilei ruh em kane ka EC ba thymmai kan ym ailad ïa ka Sorkar Assam lyngba ki bor synshar district ba kin pynwit bad ba kin pynshongsyier ïa ki paidbah ha khappud.”
“Nga kwah ban phah ïa u kyrwoh uba shai sha ki paidbah ha khappud ba kane ka EC bathymmai kan long ka jingshngaiñ na ka bynta jong ki. Baroh ngi don ka jingsngewkhia ïa kane ka kam bad ngin nym ieh ïa ki briew kiba sah ha khappud kiba ïakynduh ïa ki jingeh,” la ai mynsiem u Bah Pynïaid ïa ki paidbah kiba sah ha ki shnong khappud.
