Kan kham jwat ïa ka Block I bad II, lah ban khlieh hi u Dy CM ïa ka Regional Committee

Shillong, Nailar 22 : Ka Bynta kaba Ar jong ka jingïapynbeit pud hapdeng ka Meghalaya bad ka Assam kan long kaba kham jwat ban ïa kaba nyngkong khamtam ha kaba ïadei bad ka Block I bad II namar kiba bun ki shnong Khasi bad Jaiñtia ki hap sha Karbi Anglong. Kumta ka tyllong khubor ka ïathuh ba ïa ki Regional Committee na ka bynta kine ki Block ka sorkar ka lah ban pynkhamti biang ha u Symbud Myntri Rangbah u bah Prestone Tynsong namar u dei tang ma u uba la rim bad la shemphang bha halor kane ka kam.“ïa kine ki Regional Committee na ka bynta ka Block I, Block II, Psiar, Khanduli, Borduar, Mawtamur, Langpih bad kiwei kiwei yn sa thung noh hapoh ka 15 sngi naduh ba la dep ïakren ki ar Myntri Rangbah hynnin ka sngi ha nongbah Guwahati kata u Myntri Rangbah ka jylla u Conrad K Sangma bad u Myntri Rangbah ka Assam u Himanta Biswa Sarma.“Ha kine ki Regional Committee nalor ban khlieh da ki Myntri kum ki Chairman hynrei ki dkhot kin kynthup ruh ïa ki MLA na kito ki jaka. Na ka liang ka Assam kan kynthup ruh ïaki MDC ka KAADC ha ka Regional Committee jongka, hynrei ka sorkar Meghalaya kam pat rai halor kane namar kan dang shong jingïalang shwa ban thung ïa ki Regional Committee jongka.“Lah ban pynkynmaw na ka liang ki nongïalam ka Block II hapoh ka lama Synjuk Ki Rangbah Shnong Border Area Raid Nongtung jongka Hima Khyrim, Ri Bhoi District dang shen ki la wan ïa kynduh ïa u Symbud Myntri Rangbah ka jylla u bah Prestone Tynsong bad ki la kyrpad lypa ïa u ban bishar bniah ban ïoh wan phai tang 18 tylli ki shnong sha Meghalaya wat la ka Block II ka don haduh 213 tylli ki shnong ruh. Kine ki 18 tylli ki kynthup ïa ka Sabuda, Jatalong, Madan Umwang, Khlieh Umwang, Umlaper, Laru, Umtlieh, Ummat, Umru, Umshadktad, Pdengtliej, Umhi, Itpatung, Umsder, Umtyrshing, Umsaw Lumdorbar, Mawsladieng bad Imsohlaper.“Ki paid Khasi kiba don ha kine ki 18 tylli ki shnong ki long kumba 9000 ngut ei ei bad ki dei ki trai shnong paka. Hynrei ki don pat ruh ki paid Nepali kiba wan buhai shnong beaiñ kiba wan beit naduh Nepal ne Darjeeling kine kim duna ïa ka 5000 ngut.“Ha ka jingïakynduh bad u Symbud Myntri Rangbah kine ki nongïalam ka Block II ki la ai ruh da ka dorkhas kaba ki la pynpaw “Ngi ki Khasi kiba im ha kine ki 18 tylli ki shnong ngi khlem dawa ïa kaba long pyrshah ïa ka Riti Synshar ka Ri India hynrei ngi kyrpad ïa ka sorkar pdeng, sorkar Asssam bad sorkar Meghalaya ban pynbeit ïa kane ka kam da ka jingïasngew thuh jingmut bad shah ba ngin hap hapoh u pud u sam ka Meghalaya namar ka rukom im bad ki riti dustur jong ngi ki long beit ki Khasi paka”, pynpaw ka Synjuk ha ka dorkhas sha u Myntri Rangbah.““ Ngi kyrpad ruh ïa ka sorkar Assam ba kan long sbun mynsiem bad sngap ïa ngi namar ngim shym dawa baroh kawei ka Block II hynrei tang ïa kine ki 18 tylli ki shnong Khasi bad sngewbha shah ba ngin hap hapoh u pud u sam ka Meghalaya”““Ngi la buh ka jingkyrpad ba ka sorkar ka dei ban ïakhun ban ïoh biang ïa kine ki 18 tylli ki shnong jong ka Raid Nontung jong ka Hima Khyrim kiba la shah pynhap jubor sha ka Assam namar ngi kum ki nongshong shnong ngi kwah ban don sha ka jylla Meghalaya” ong u Bah Blikstar Sohtun Chairman synjuk haba kren bad ki lad pathai khubor.