Kam trai ki bahaïing lai tylli ki metïap napdeng saw ngut kiba shah pynïap dusmon ha Umpleng
Khliehriat, Naitung, 07: Ki bahaïing hasem ki la leit ban kam trai ïa ki lai tylli ki metïap napdeng ki saw ngut kiba la shah pynïap dusmon ha kaba ïa ki metïap la lap ha lyndet ka iew Umpleng, East Jaiñtia Hills District ha ka step sngi Saitjaiñ.
Hadien ba la pyndep ïa ka postmortem ha Civil Hospital, Khliehriat, ki Pulit ki la aiti noh sha ki bahaïing hasem ban pyndep ïa ka jinglehniam bakhatduh hadien ba ki la leit kam trai ïa ka met jong u Ravi Rai, 23 snem ka rta na ka shnong Elam, Mechipradesh, Nepal, u Rajesh Rai 26 snem na ka shnong Dharan Sunsari, Koshi Anchal, Nepal bad ïa ka met jong u Nasar Kyndait, 33 snem ka rta na shnong Dkhiah East Pohshnong, East Jaiñtia Hills District.
Katba sa ïa ka met jong uwei ym pat shym la don satia ban kam trai haduh mynta.
Halor kane ka jingshah pynïap dusmon jong kine ki saw ngut ki Pulit jong ka East Jaiñtia Hills District ki la register case ha Khliehriat Police Station bad ka jingtohkit halor kane ka dang ïaid shakhmat.
Kum ban shu pyntip, ki Pulit jong ka East Jaiñtia Hills District ha ka sngi Saitjaiñ ki la leit ban shimti ïa ki saw tylli ki met ïap kiba la shah pynïap dusmon bad ïa ki met jong ki la lap ha lyndet jong ka iew ha ka shnong Umpleng.
Ïa ki metïap jong ki saw ngut la teh la khum lang na ki kti da u tyllai bad la pom dusmon ruh ïa ka met jong ki da ki tiar ba nep na ki bynta ka khlieh bad ryndang.
Ka jingshah pynïap jong kine ki saw ngut ka long kaba ishyrkhei haduh katta katta.
Ïa ka met jong kine ki saw ngut la lap da ki nongshong shnong jong ka shnng Umleng ha ka step sngi Saitjaiñ ha kaba la pyntip noh sha ki Pulit jong ka Umpleng Anti Dacoity Camp.
Hadien kane, ki Pulit ryngkat bad ka kynhun CSU, Mobile Forensic Crime Scene Unit bad u Magistrate ki la leit sha ka jaka ban ba la lap ïa ki metïap ban pynlong ïa ka jingtohkit kaba bniah bad hadien ba ladep lum ïa ki sakhi satar la pynkynriah noh ïa kine ki metïap sha Civil Hospital Khliehriat ban leh ïa ka Postmortem.
U Superintendent of Police jong ka East Jaiñtia Hills u la pyntip ba la thaw ïa ka Special Investigation Team (SIT) ban ïarap lem ïa u Investigating Officer (IO) na ka bynta ban pynlong ka jingtohkit kaba bniah halor kane ka jingjia khnang ban lap ksai ïa kiba donkti ha kane ka runar kaba la pynkyiuh bad pynher mynsiem lut ïa ki paidbah nongshong shnong jong ka jylla.