Kam trai ka LABDC ïa 16 tylli ki Shnong ba hap ha ka Langpih Sector

Nongstoiñ, Nailur 19: Ka jingthmu jong ka sorkar Meghalaya bad Assam ban pynkut noh ïa ka jingïakajia pud kaba la neh la palat sanphew snem bad kaba la urlong ruh ha jingsdang ïa ka wat kaba nyngkong.
Hynrei, imat ha ka wat kaba ar te la kham jwat namar mynta la mih sa ka seng ki jaitbynriew Nepali, kaba la tip kum ka Lampi Anchalik Border Development Committee, kaba la ïadon bynta lang da ki heh ka sorkar Assam, ha kaba ka la phah da ka jingthoh sha u Himanta Biswa Sarma Myntri Rangbah ka Assam bad dawa na u, ba ïa ki khat hynriew tylli ki shnong um dei ban khynñiat sha Meghalaya.
Kitei ki shnong kiba katei ka Committee ka la kdew ha ka map ki kynthup ïa ki shnong Khasi bad Garo bad kitei ki shnong ki dei ka Hahim, Kampaduli, Bangjeng, Nawapara, Dronpara, Sohmarang, Nongma kaba ki khot ka Panbaripahar, Lower Lumpi (Langpih), Umtap, Lawbah (Harshanagar) Umali (Umwali), Umsing (Uwahsiang), Makoibari, Mawlan kaba ki khot (Katapara), Mawsikar kaba ki khot ka Upper Lumpi, Umbarot kaba la tip kum ka shnong Umbyrsit. La ong ruh ba lada um kohnguh ïa ka jingdawa jong katei ka Committee, kin pynlong da ka jingïakhih kaba jur ha ka jylla Assam baroh kawei.
Katkum ka jing wad jingtip kaba bniah bha, la lap ba ka jingdawa jong katei ka Committee jong ki Nepali, ka dei halor ka nongrim ba ki don ki nongshong shnong na kitei ki shnong kiba dei ki Khasi, kiba la ïoh jingïarap na ka sorkar Assam kum ki skhim shna ïing, shna pynthor, ki skhim ha ka rep ka riang bad kiwei kiwei lyngba ka jinglong ksiang jong ki katto katne ki rangbah kiba kwah ban ïoh jingmyntoi ïalade.
Nalor kata ka surok rong na Kamphaduli shaduh Mawsikar (Upper Lumpi) bad ki ar tylli ki ktem pulit ka Lower Lumpi BOP bad ka Upper Lumpi BOP, ki dei ki maw nongrim kiba skhem kiba pynlong ïa katei ka Committee, ba kan dawa na u Myntri Rangbah ka Assam ba um dei ban pynhap ïa kitei ki shnong sha Meghalaya.
Lah ban pynkynmaw ba watla ïa ka wat kaba nyngkong ki ar ngut ki Myntri Rangbah ki la dep ban ïasoi ïa ka soskular. Hynrei kam shym la pynhun ïa ki nongshong shnong ka Jylla kiba la shah khynñiat jubor sha Assam bad ka la pynkhih win ruh ym tang ïa ki paitbah nongshong shnong ha khappud, hynrei ïa baroh ki paitbah ka jylla bad ïa ki sengbhalang, ha kaba ki la kynnoh ba katei ka jingïasoi ïa ka soskular pynbeit pud khlem da pan jingmut na ki nongsynshar hima, na ka KHADC bad na ki nongsynshar shnong ka dei ka jingleh donbor jong ka sorkar.
Nalor kata ïa kitei ki jaka kiba la dep ïa soi ïa ka soskular pynbeit pud ym shym la don kano kano ka kynhun napoh ka jylla Assam kaba dawa bad phah syndon da ka jingthoh sha u Myntri Rangbah ka jylla Assam ryngkat ka map kaba biang ryngkat ki kyrteng jong ki shnong kumba ka long ïa ka Langpih sector.
Kumjuh ruh katkum ka jingkam jong u Conrad Kongal Sangma Myntri Rangbah ka jylla, ba u la dep ïakynduh ïa u Himata Biswa Sarma Myntri rangbah ka jylla Assam, ha kaba ki la dep ïa pynbeit ba kin sa phah noh shen ïa ki Chairman jong ki Regional Committee on Border Dispute, ba kin leit jurip ïa ki jaka kiba hap ha ka Langpih sector bad ba kin sngap ïa ka mon ki paitbah shano ki kwah ban don sha Meghalaya ne sha Assam.
Hynrei, ha kaba ïadei bad ka jingthmu jong ki ar ngut ki Myntri Rangbah ban sdang noh ban pynbeit ïa ka wat ba ar, kata ïa ki shnong kiba hap ha ka Langpih sector, mynta pat la mih sa katei ka kynhun ki Nepali kaba pynkhih win bad ka lah ruh ban mih ka jinghuri hura, lada u myntri rangbah ka Assam um kohnguh ïa ka jingdawa jong katei ka Committee, namar ki la byrthen kin pynlong da ka jingïakhih kaba jur ha ka jylla Assam baroh kawei.