Kam sngewtynnad ban shu pynthohbria bad kynnoh ba ka Sohra kam long kaba shngaiñ – Bah Titos W Chyne

Shillong, Jylliew 04 : U MDC ka Sohra ba dei ruh u Nongïalam ka Liang Pyrshah ha KHADC, Bah Titos W Chyne ha ka sngi Balang u la ong ba kam ïahap satia ban shu pynthohbria bad kynnoh ba ka thaiñ Sohra kam long shngaiñ na ka bynta ki nongwan jngohkai pyrthei tang na ka daw ka jingjah ki shijur na Indore kiba wan kai dang shen sha kane ka jylla.
Haba kren bad ki lad pathai khubor u Bah Titos u la ong, “Haduh mynta hi ngim nang shuh ban ong ei ei halor kane ka jingjia hynrei ka shong ha ki pulit bad ka Special Team ban tohkit.”
Nangta u ong ruh ki jingjia aksiden ki ju jia beit la ka long ha ka ri ne wat ha kiwei ki ri ka pyrthei. “Hynrei kam long pat kaba dei ban shu kynnoh kyllum pat ba ka jaka ha Sohra bad ki thain ha ka jylla jongngi ki long ki bym shngaiñ lane ban kynnoh ba ki briew jongngi ki dei ki nongpynïap briew. Kum kata, ngim lah satia ban pdiang bad ngi dei ban pynrem ïa kum kine ki jingkynnoh namar kine ki ktah pat ïa ka ïap ka im jong ki paidbah kane ka thain kiba ju imja na ka kam jngohkai pyrthei,” u la ong.
U Bah Titos u ong ruh ba u kwah ban kyntu ïa ki nongwan jngohkai pyrthei kiba wan sha ka thain Sohra ba ki dei ban shim ïa ki lad jingïada na ki trai shnong ne ki bor pynïaid kum ki nongïalam lynti lane ki jingtip kiba ïadei bad ki jaka kiba shngain ban leit. U ïathuh ba ki lah ruh ban shim ïa ka jingïarap jong ki kali kamai kiba la don mynta ha Sohra kiban ïalam kai sha ki jaka jngohkai kiba shngain.
“Nga kyntu ïa ki paidbah ba ki dei ban long kiba husiar ban leit sha ki jaka jngohkai kiba ma khamtam mynta ba dei ka por slap ha kaba bun ki jaka ïaid ki btuid bad ki wah ruh ki heh bad bun ki lynti kiba long khlaw. Kaba donkam ïa ki ka long ban don da ki nongïalam kiban ïalam lynti ïa ki,” u la bynrap shuh shuh.
Ha kawei pat ka liang, u Bah Titos u ong ba naduh mynshwa bad tad haduh mynta haba don mano mano ba jah baroh la ka long naduh ma u kum u nongmihkhmat ryngkat ki paidbah ryngkat ryngkat bad ki pulit ki ju ïa trei lang ban wad.
“Hynrei ban shu kynnoh ba ki trai shnong ne ki pulit kumjuh na ka sorkar ba ki khlem leh ei ei ka long kaba bakla. Nga ïohi ba na ka liang ka sorkar khamtam na ka liang ki pulit, ki special team ryngkat ki paidbah ki la trei shitom wat hapdeng u lapbah bad bad hiar sha ki jaka riat jaka ram ban wad ïa kiba jah. Kumta ban kynnoh ba ka don ka jingshim sting na ka liang ka sorkar bad ruh na ka liang ki trai shnong ka long kaei kaei kaban ïalam bakla,” u la ong.
Na ka liang jong u, kum u MDC u Bah Titos u pynpaw ba u kwah ban ai ka burom kaba kyrpang ïa baroh kiba la donkti ban wad ïa kitei ki arngut kiba jah, kata ïa u Raja Raghuvanshi uba la lap noh ha ka 02tarik mynta u bnai katba ka jingwad ïa ka kurim, ka Sonam Raghuvanshi ka dang ïai bteng haduh mynta.