Shillong, Naiwieng 10: U Superintendent of Police ka East Khasi Hills u Bah Vivek Syiem u la ong ba kam don satia ka jingshah pynbor ban pynlait ïa ki nongïalam ka Meghalaya Commercial Truck Owners & Drivers Association (MCTODA) kiba la shah kem.
U la ong ba ïa kine ki nongïalam la kem ha ka jingjia ba pynpaw ka jingpyrshah ha Mawryngkneng, bad kine ki la ngat ha ki 4 tylli ki jingjia ba kynthup ïa ka jingkawang maw bad ka jingpynjulor ïa ki kali.
U la ong ba ka jingai jamin ïa ki ka shong beit ha ka Ïingkashari.
Na ka liang u Bah Syiem u la batai ba la dep ban maham lypa da magistrate ba don ha ka kam ba kam dei ban don ka jingpynthut ïa ka ïaid ka ïeng jong ki paidbah bad ki kali, ha kaba kane ka la lam ruh sha ka jingtied lathi jong ki pulit kaba long ruh tang malu mala.
U SP u la kyntait ruh ïa ki jingkynnoh ba la pynbun ïa ki pulit ha kane ka jingjia.
