Kam pat dei ka jingjulor kaba heh lada nujor bad ka jingkhyllem u Dome : Myntri Transport

Shillong, Jymmang 25 : U Myntri ka tnad Transport, Bah Dasakhiat Lamare hynne ka sngi Balang u la hiar ban jurip ïa ka jaka pynïeng bos kaba don ha Mawiong kaba tip kum ka Inter State Bus Terminus hadien ba katei ka jaka ka la mad ïa ka jingjreiñ um kaba jur.
Ha katei ka jingleit jurip, u Myntri u la leit ruh ban peit ïa baroh ki jaka kiba jreiñ ha katei ka sngi kiba la dep ban maramot mardor hadien katei ka jingjia.
Na ka ka liang jong u, haba kren bad ki lad pathai khubor u la ong ruh ba lada nujor ïa katei ka jingjia bad ka jingkhyllem u dome jong ka Iing Dorbar Thawaiñ ka jylla kam ïahap shuh shaei shaei. “Ban nujor ïa ine i jingjia bad ka jingkhyllem jong u dome jong ka Iing Dorbar kaba katne kam ïahap shuh keiñ,” u la ong.
Shuh shuh u la pynshai ruh ba ka jaka ba jreiñ bad jaw um ha ka sngi ba jur bha u slap kadei tang na iwei i jaka ba pynïasoh kaba don artad ïa ka jingorpait kaba rit. U Myntri u la ong ba ka dawbah hi kadei na ka jingsahkut ki pipe um bad kane hi ka pynlong ïa ka um ban lang bun bad haba ka la lang slem ka sdang pat ban jreiñ kat na jaka ba ïohlad.
“Kane ka um kaba jreiñ bad jaw pat kadei kaba lang na kyndong kyndong bad sa poi pat ka jingjreiñ um,” u la ong.
Haba pynshai bniah pat halor ka jingbuh da ki kynja jri ha ki jaka ba pynïasoh ïa kawei ka jingtei bad kawei pat ka long ba kan ym don ka jingiatyngkhuh kawei ka jingtei bad kawei pat ha ka por ba ïaid ki bos na katei ka jaka.
“Katei kadei ka rukom ban shna namar lada don u phong bad ki kynja jri hapdeng kitei ki jingtei kin ym tyngkhuh hynrei lada ym don pat ka dewbilat kan sa or pait beit,” la bynrap biang u Mynri.
Ha kawei pat ka liang u Myntri u la ong ba u kwah ruh ban pyntikna ha kiba wan bad kiba pyndonkam ïa kane ka ISBT ba kam don kano kano ka jingsheptieng hynrei ka long shngaiñ. U ong ruh ba lada don kano kano ka jingeh na ka liang jong u ryngkat ka Department ki don ka jingkitkhlieh ym dei tang mynta ne lashai hynrei katba ka kam ka dang ïaid.
Ha kane ka sngi, u Myntri u la bthah ruh ïa ki ophisar ba dei peit ïa ka ISBT ba ki dei ban peit bniah halor ka jingud jong ki paidbah ba ki don ki kynhun kiba ju lum beaiñ haduh 200 tyngka naman kawei pa kawei ka kali hapoh katei ka jaka pynïeng bos.
“Ki don ar tylli ki kynhun kiba la ïoh jingbit ban lum ïa ka bai pynïeng kali, hynrei katkum ka jingmih ka khubor ka la don sa kawei ka kynhun kaba lum pisa be-ain na ki kali kit mar, kumta ym dei ban ailad ïa kano kano ka jinglum pisa be-ain bad dei ban kem bad pynshitom ïa kiba donkti ha ki kam be-aiñ,” la kyntu u Myntri ïa ki ophisar.