Kam mut tangba u long CM un lah ban phah ïa ki bor Pulit ban siat iap ïa ki briew : Dy CM

Shillong, Naitung 25 : U Symbud Myntri Rangbah ka jylla ne u (Dy CM) u bah Prestone Tyngsong u la ther da kaba tygneh ïa u Bernard Marak MDC na Tura bad Vice President ka BJP ba u la kynnoh ïa u Myntri Rangbah ka jylla u Conrad K Sangma hana ba u phah siat iap ïa u, da kaba u la ong ba u Bernard u dei ban tip shai ba kam mut tang namar ba u long u Myntri Rangbah ne CM un lah ban phah ïa ki bor pulit ban shu siat iap ïa ki briew ne ban leh ïakino kino ki kam beaiñ, namar um long halor jongka aiñ bad ka aiñ ka ïa ryngkat ïa baroh. Kane ka jingkynnoh u Bernard ka long tang ban da rapjot ïalade bad pynthame ïa ki paidbah namar um lah shuh ban buhrieh ïa kaei kaba la sei madan da ki pulit ïa ki kam awria jongu hapoh katei ka ïing basa jongu.
U Bernard uba dang jah rngai haduh mynta mar ïatip ba ki pulit ki leit khynra bad lap ïa ki kam awria bad beaiñ jongu ha katei ka ïing basa jongu ha Tura.
“ Ki jingkynnoh ki dei ki jingkynnoh bad ma nga ne ki paidbah ruh kim don jingngeit satia ba u Myntri Rangbah u leh kumtei tang na ka daw ka kam saiñ pyrthei lane tang namar ba un ïeng ban ïaleh pyrshah ïa u myntri rangbah ha ka election MLA ban long ha u 2023. Ha kino kino ki constituency ne wat ha ka constituency jong ngra ruh kin don beit ki ban ïeng ïaleh pyrshah ïa nga bad kane kam mut tang ba nga don ha ka bor ngan phah ban leh da ki kam poh bad kam beaiñ” ong u bah Prestone.
U Symbud Myntri Rangbah u la ong lada u Marak u la tip haduh katta ba u Myntri Rangbah u phah siat iap ïa u balei um ujor da ka FIR ba un ïoh jingïada hynrei u phet rieh pynban mar iï lap ïa ki jyrsieh ha ka ïing basa jongu.
“ Kane ka jingkynnoh jong u Bernard ka dei kaba khia bha ba kat u Myntri Rangbah un phah siat iap ïa u. Kane ka long ka jingkynnoh kaba ktah bha bad um lah ban shu kren sha ki lad pathai khubor khlem da ujor da ka FIR ha ka jingshisha ula dei ban ujor ejahar shwa bad sa ai da ka press conference ruh lada kita ki jingkynnoh ki long kiba shisha” ong biang u Symbud Myntri Rangbah.
“ Kane ka dei tang ka drama politik bad dei ka buit sianti jongu Marak ba un ïoh jingsngewsynei na ki paidbah bad ban ïoh pynklet ïa ki jingshisha ba la sei madan da ki pulit. Balei ba u Bernard u sheptieng bad balei u phet rieh? Lada ki pulit ki kwah tohkit ïa u balei um leit sha ki pulit hynrei thaw drama politik pynban ïa kane ka jingjia?Kylli u Symbud Myntri Rangbah.
Halor ki jingkylli u Symbud Myntri Rangbah u la ong lada ki jingkynnoh jongu ki long kiba shisha balei um ai ka jingujor khnang baki bor ka aiñ kin ïoh leh ïa kaba donkam. U Bernard um dei ban shu kynnoh kumne khlem nongrim tang namar ba ki pulit ki leit khynra ïa ka ïing basa jongu, u la dei ban ap ïa ka jingtohkit ban pyndep lut nadong shadong.
U bah Prestone u la ong ba ki pulit ki leit khynra ïa ka ïing basa jongu hadien ba ki la ïoh jingtip kaba thikna bha namar khlem ki sakhi sabut bad khlem ki jingtip ba thikna kin ym lah ban shu leit matlah tang namar ba bthah ne hukum ïa ki da u CM, Dy CM ne HM.
U la ong ba ki pulit ki leh la ka jong ka kamram hadien ba ki la dep tohkit bniah halor kane ka kam.Kat haduh mynta 22 la set phatok ïaki bad 10 ngut ki dang don ha byndi ki pulit.
“ Ai ba kane ka jingtohkit kan kut bad ngin sa sei madan shuh shuh ïa kaei kaba dei ban sei ban shai ki paidbah bad ngin tip bniah ruh mano ba don ha katei ka ïing basa” ong u bah Prestone.
Halor ki jingkynnoh ka Congress ba ka jingkhynra ka long tang ban tep eit miaw ïa kam beaiñ ka sorkar MDA u bah Prestone u la jubab “ Ngam don por ban ïa ktait bad jubab ïa kum kine ki jingkynnoh bym don nongrim la ka dei ka Congres ne kino kino ruh namar kine ki jingkynnoh kiba ym don nongrim satia.
U Symbud Myntri Rangbah u la ong ba ka kamram jongka sorkar ka long ban ïada ïa ka jingim jong baroh ki nongshong shnong haba jubab ïa ka jingkyrpad ka BJP ban ai ka jingïada ïa u Bernard N Marak.