KAM Meghalaya: Ka rynsan pyrkhat saiñ pyrthei kaba thymmai jong ki paidbah ka Meghalaya

Shillong, Jylliew 19: Ha ka 17 tarik Jylliew 2022 ka KAM Meghalaya ka la pynlong ïa ka jingïalang jong ki nongshong shnong ha Anchorage Guest House ha Malki point bad kumba spah ngut ki nongshong shnong kiba na ki jylli bapher, kiba trei ki jaitkam bapher bad ki samla pule ki la wan bad ïashim bynta shitrhrem ha ka jingïatai bad ïatei nia halor ki mat ki ishu kiba ktah jur ïa ka Jylla mynta. La pynïaid ïa ka rynsan jingïalang da i Kong Wanpynhun Kharsyntiew, i nongïalam jong ka Seng ki nongtrei ïingbriew (All Meghalaya Domestic Workers Union)
Ka KAM ka kut jingmut ban ïeng bad ïakhun nyngkong eh pyrshah ïa ka jingsngew kutlad bad jingduh jingkyrmen kaba mih na ka daw ka jingrunar bad jingsniew jong ka synshar khadar ha kane ka pateng. Ka synshar khadar ha kane ka pateng ka la kheiñ dewthala lut ïa ki nongrim jong ka ynshar-bishar bad ka treikam treijam; kum ka hok, ka jingshisha, ka jingai jingkheiï bad ka jingïatip lem.
Haba ai ka jingkren maitphang, ka Kong Angela, kawei na ki nongseng jong ka KAM Meghalaya ka la ong, “Ngim dei ban shah pynbor ne shah pynbieij ha kata ka rukom pyrkhat kaba la ïaid ïew bha mynta kaba ong ba ngin jied noh ne pynïasoh ïalade bad ki briew kiba kham duna ka jingleh sniew ne kiba kham duna ka jingbam sap ne kiba kham duna ki kam thok kam shukor. Ngim lah da lei lei ruh em ban ïapeiï bad ïapynleit pynwan ïa ki nongrim tynrai jong ka jingim, ka hok, ka jingshisha bad ka jingñiewkor ïiewburom para briew kiba ngi hikai ïa ki khun ki kti.”
U Kyrsoibor Pyrtuh u la ong, “ngim dei ban man thait ban ïatai nia bad wanrah ki jingmut, ki buit bad ki jingtip kiba shai kdar bad ngim dei ban tieng ne phet rieh na ka jingïatai nia kaba laitluid. Ka jingkylla kan ym wan lymda ngi ïathir-ïatai halor ki saiñpyrkhat bad ki mat ki jura kiba ktah ïa ki paidbah nongshong shnong. Ha kajuh ka por pat ki jingïatai kin shu bijai ei bad kin ym larkam satia lymda ngi jngi bad ïashim bynta ha ki jingïakhun bad jingïakhih kiba man la ka sngi ban ïeng pyrshah ïa ki bor jong ka jingbamsap, ka thok ka shukor bad ki kam pyntriem kiba bun jait.”
Ka KAM ka mih na ki jingïashem kiba ngi mad ha ki jingïakhun bad jingïaleh kiba bapher jong ki riewpaidabh bad ki nongshong shnong. Naduh ki jingïakhun na ka bynta ka jingïalong mar ryngkat shynrang bad kynthei haduh ka jingïakhun na ka bynta ban ïada bad pynneh pynsah ïa ka mariang, ki jingïakhun na ka bynta ki hok jong ki nongtrei nongbylla bad kiwei kiwei. Ka jingïakhun pyrshah ïa ka jingsynshar leh jubor bad jingpyn ïashun-ïasih para briew kaba ktah ïa ka longbriew manbriew ka dei ka phang pdeng kaba kongsan jong ka KAM. Ka KAM ka thmu ruh ban pynkhie im pat ïa ka synshar paidbah ba nylla bad ka lawei kaba ïeng skhem ha ka hok.
Ha kataei ka jingïa lang jong ki nongshong shnong bad ki kynhun bapher jong ki nongshong shnong la ïatai bniah halor ki nongrim bad ki jingthoh ba ka KAM Meghalaya ka la pynkhreh bad kane ka la long ka jingkyrkhu bad yn nang lah ban pynbha shuh shuh ïa ki.
La ïatai ruh shaphang ka jingdonkam ban ïa buh kti lem ha ka elekshon ka ban sa long ha ka snem 2023, tangba halor ki nongrim kiba shai kdar bad kiba hok. Ka KAM ka tyrwa ba ngi dei ban ïamir lang bad ïatreilang watla hapdeng ki jingïapher bad jingïaprat jingmut. Ka KAM Meghalaya ka pynpaw shai ba kan ym lah ban ïapeiñ ïa ki nongrim jong ka hok, ka jingshisha, ka jingïatip lem, ka jingïniew kor bad jingburom kylliang iwei ïa iwei pat. Da ka jingïawan lang ngin lah ban ïakhun ïa ki jingsniew ha ka synshar bishar jong kane ka pateng bad ngin tei thymmai da kawei pat.
Ka KAM ka kdew hangne ïa ki 15 tylli ki mat bad ki phang kiba kongsan tam na ka bynta ban pynkhie im ïa ka synshar paidbah bad ban tei ïa ka Meghalaya kaba mait shaphrang:
Ka treikam treijam kaba beit bad kaba ai jingkheiñ, ban pynduh jait ïa ka bamsap bad ki kam be-aiñ ha ka synshar khadar, ban pynneh pynsah bad ïada ïa ka khyndew, ka mariang bad ban kyrshan ïa ki nongrep, ka koit ka khiah kaba paka bad kaba bha, ka pule puthi kaba bha ïa baroh, ka ïoh ka kot kaba ai bynta bad ai bhah lang ïa iwei pa iwei i nongshong shnong, ban pynkhlaiñ ïa ka synshar khadar bad ki kam pynïaid shnong pynïaid thaw lyngba ka jingpynkup bor pura ïa ki nongshong shnong, kaba bei tyngka pura bad ka jingsynshar kaba shai bad kaba ai jingkheiñ, ban kyrshan pura ïa ki samla, ban pynduh jait ïa ka bamsap ha ka thung kam thung jam, ban ïada ïa ki hok jong ki nongtrei nongbylla, ban wanrah ïa ka jingïalong mar ryngkat hapdeng shynrang bad kynthei, ka hok ki kynthei bad kiwei ki kynhun, ban wanrah ka shongsuk shong shngaiñ ha iwei pa iwei i nongshong shnong, ban ïeng pyrshah ïa baroh ki jait jingshong shit niam, ban pynneh bad ïada ïa ki hok jong ka Jylla ha ka jingïadei bad ka Sorkar India bad ruh ban pynneh ïa ki jingïapher bad jingdon ki seng bapher ha ka saiñ hima, ban pynshlur ban ïatai nia bad ïaprat jingmut.
Ka Rynsan KAM ka khot ka wer ïa baroh ki nongshong shnong ban ïadon kti ban ïakhun na ka bynta ban pynduh shi syndon ïa ka saiñ hima kaba pynïaid tang da kawei ne ar tylli ki longïing bad kaba kyrshan da ki heh sai pan kiba rhah spah bad khwan myntoi shimet.
Sa shisien ka Kong Angela ka ban jur, “Ngi lah ban dei tang ki nongtrei nongbylla, ki nongdie madan, ki nongthoh kot khubor, ki nongthoh kot, ki nongrep, ki nongtrei ïing briew, kiba shu shong ïing, ki samla pule, ki samla wad kam, kiba treikam lajong, kiba la shong thait na ki kam , ki nonghikai, ki nongtem, nongthaw jingrwai, ki barikor, ki nongoh bad nongdro dur, ki riewshemphang bad ki riewïakhun, hynrei ngi ïa mir lang bad don tang kawei ka jingthmu ban pynïoh biang ïa ka synshar paidbah kaba nylla bad ban kren ïa ka hok bad jingshisha.”
“Ka KAM ka ngeit ba ka jingkylla kan ym jia tang lyngba ki nongïalam kiba hakhmat, hynrei ka jingkylla kaba shisha kan urlong da ka jingïawan lang ki paidbah nongshong shnong kiba angnud ban shem ïa ki nongrim jong ka jinglong trai shnong ha ka Ri/Jylla synshar paidbah bad ban mad ïa ki ha ka jingim kaba manla ka sngi.
Ba phin tip kham bniah shaphang ka KAM lane ban pynïasoh bad ka, sngewbha leit sha website: wwwkammeghalaya.in lane telephone bad WhatsApp ha u nombar 9863097754 / 6033005175.