Shillong, Ïaiong 19 : Bun ngut ki MLA na ka All India Trinamool Congress kynthup na kiwei ruh ki party ki la sdang ban leit khroh tiket na ka National People’S Party (NPP) ban ïoh aireng na katei ka party ha ka elekshon MLA kaban sa long ha u 2023, ong u Working President ka NPP Meghalaya, Bah Sniawbhalang Dkhar ba dei ruh u Myntri ka tnad Urban Affairs jong ka sorkar jylla.
Katkum ka jingong jong u, ki don haduh palat 10 ngut ki MLA na kiwei ki party kynthup lang na ka TMC kiba la wan ban pan tiket na ka NPP mynta khnang ba kin ïoh ban pynkhreh noh na bynta ka elekshon ban wan bad ruh ban ïoh ieh noh ïa ka party ba ki don baroh shi katta.
Da kaba kubur ba don ki MLA na ka TMC ruh kiba wan ban ai ksai, u Bah Sniawbhalang u la ong, “Imat ka lah ban dei ba ki paidbah hi kim pat kwah ban pdiang ïa kane ka party thymmai. Watla katta ngin peit shwa namar ka por ka dang don sa katto katne katban poi ka elekshon.”
Halor ka jingkylli la ki nongïalam ba hakhmat jong ka TMC ruh kin wan ban pynïasoh lang sha ka NPP na bynta ka elekshon 2023, utei u heh NPP u la ong ba ka por kam pat long satia ban ïathuh paidbah lut.
Katkum ka jingong jong u, ki dang don ruh bun kiwei ki MLA kiba ym pat lah satia ban rai na kaei ka party kin ïakhun ha kane ka elekshon ban wan bad dei na kata ka daw na ka party ruh kim pat kwah satia ban shim rai kyrkieh haba ïadei bad katei ka bynta.
Kumba long haduh mynta, ki khubor ki la ïaid bha ba tang na ki 5 ngut ki MLA Congress kiba la shah sospon dang shen, kumba 2-3 ngut na ki, kin leit ban ïakhun na ka tiket NPP bad kiba sah na kitei ki lah ban leit ïakhun na ka tiket UDP.
Lah ban kdew hangne, ba ka Trinamool Congress ka don haduh 12 ngut ki MLA jong ka kynthup ha rilum Khasi bad ruh ha rilum Garo hapoh ka jingïalam jong u Dr. Mukul Sangma bad Bah Charles Pyngrope.
