Kam ka JNC ban leh da ki kam ym tang ban buh ïa ki signbord jingmana ïa ki kali ba ïeng halor jingkieng ha Sonapyrdi

Khliehriat, Naitung 27: Ki dkhot jong ka Jaiñtia National Council hapoh ka jingialam u Art and Culture Secretary, u bah Mehi Rymbai mynta ka sngi ki la hiar jurip sha ka thaiñ Narpuh bad ki la jurip khamtam ïa ki jingkieng kiba don ha ka thaiñ Sonapyrdi, ka seng ka la kyntu ruh ïa ki bor ba dei peit ba ki dei ban da leh bad ki kam ruh ban nym shah ïa ki kali ba kin ieng pathar halor ki jingkieng, ym dei ban shu buh tang ki signboard jingmana.
Haba kren sha ki pathai khubor, u bah Mehi Rymbai, u la pynpaw ka jingsngew khia halor ka jingbym shim khia ki bor ba dei peit namar ba ki kali ju pynieng halor ki jingkieng bad kane kan pynlong ïa ki jingkieng ba kin jot bad julor kloi bad lada ki jingkieng ki jot kan buh jingeh ïa ka leit ka wan jong ki paidbah.
Ha kajuh ka por, u la kynthoh jur ruh ba ka jingdon ki shipai Border Security Force kiba ieng ap pahara ha ka jingkieng ha Sonapyrdi ka dei kawei kaba ju pynlong ïa ki kali ba kin ieng halor ki jingkieng.
Na ka liang ka seng ka kyntu jur ïa ki bor ba dei peit ba ki dei ban shim khia ban tehlakam noh ïa kane ka jingieng (parking) ki kali halor ki jingkieng ha Sonapyrdi, ym ban shu buh tang ki signboard.
Ka jingbym don ki pulit ban pahara ha ki jingkieng ha Sonapyrdi khamtam ha ki jingkieng jong ka wah Lukha, ka pynlong ïa ki nongñiah kali khamtam kiba ñiah ïa ki kali heh ba kit jingkit ba kin pynieng ïa ki kali halor ka jingkieng ha ka wah Lukha bad kane ka jingpynieng ïa ki kali heh ka lah ban warah ïa ka jingjulor ka jingkieng bad lada katei ka jingieng kan pra ne julor kan buh jingeh ïa ki paidbah ka thaiñ bad ïa ka jylla Meghalaya hi baroh kawei, namar ka dei tang katei ka jingieng kaba pyniasoh ïa ka jylla Meghalaya bad kiwei kiwei pat ki jylla kiba mar jan kiba don ha ka thaiñ shatei lam mih ngi, kumjuh ruh dei na kane ka lynti hi ba ki kali kiba kit jingkit ki ïaid lyngba man la ka sngi ban pynpoi ïa ki mar ki mata kynthup ki mar bam shapoh ka jylla bad kumjuh ruh lyngba kane ka jingkieng la ju phah ïa ki mar sha kiwei pat ki jylla, kane ka jingkieng ha ka wah Lukha ka dei ruh kaba hap hapoh ka national highway 6 ha East Jaiñtia Hills District.
Kumjuh ruh, na ka liang ki paidbah jong ka thaiñ Sonapyrdi ruh ki la pynpaw ka jingsngew khia halor ka jingpynieng kali halor katei ka jingkieng khamtam ki kali heh kiba kit ïa ki jingkit kiba khia, namar ki kwah ban katei ka jingkieng kan neh bad katei ka jingieng ka dei ruh ka jaka kaba ki briew kiba na jan bad na jngai khamtam ki nong jngohkai pyrthei ki ju sngewtynnad ban ieng peitkai nalor ka jingkieng, namar nalor kane ka jingkieng lah ban iohi shynna bha ïa ka wah Lukha bad lah ruh ban iohi ïa ka khlaw ba rben ba ju tip kum ka Narpuh Wildlife Sanctuary, ki paidbah ki la pynpaw ba lada ki kali ki ieng (parking) ha katei ka jaka kan buh jingma ïa ka tei ka jingkieng kaba itynnad kaba pyn phuh pyn phieng ïa ka thaiñ.